ආච්චිගේ ජන්දය

අපේ ආච්චිට දැන් ගොඩාක් වයසයි. (මගේ නොව මගේ බිරිඳගේ ආච්චීය.) ඒ කෙසේ වෙතත් මෙවර මැතිවරණයේදීත් ඇය තම මනාපය නොහොත් ජන්දය භාවිතා කිරීමට තරම් මනා ශරීර ශක්තියකින් හෙබි වූවාය. එමෙන්ම ඇය ඒ වෙනුවෙන් මග බලා සිටියාය. ඇයගේ වයස නිසාම දැන් ඇයගේ ඇස් පෙනීම ගොඩාක් දුර්වලය. එනමුදු ඒ ගැන නොතකා ඇය ජන්ද පොළට ගියාය. මෙහිදී ඇයට මහත් කරදරයක් විය.

ඇය කැමත්ත පල කිරීමට සිටියේ "ඇඳට" යයි කියමු. ජන්ද පොළේ මෙවැනි අසරණ අය වෙනුවෙන් ජන්දය ලකුණු කිරීමට වෙනමම නිළධාරීන් නම් කර ඇත. ඔවුන්ගේ කාර්යය වනුයේ අදාලා පුද්ගලයා කැමති පරිදි කතිරය ගසා ජන්දය ලකුණු කර දීමය. නමුත් මේ අතර එක නිළධාරිණියක් යම් යම් නිසි නොවන ක්‍රියාවන් කරමින් සිටින්නට විය. ඇය සහාය දැක්වූයේ "ගෙම්බා" ට යැයි කියමු. ඇය කළේ මෙවන් අසරණ අයගේ ජන්දය ගෙම්බා ලකුණ ඉදිරියේ හොරෙන් ලකුණු කිරීමය. මේ ගැන කිසිවෙකුටත් සැක නොසිතෙන අයුරින් කිරීමට තරම් ඇය දක්ෂ වූවාය.

අපේ ආච්චී ජන්ද පොළේදී අර කී කාන්තාවට මෙසේ කියන්නට විය.

අනේ ළමයෝ... මෙන්න මේක ඇඳට ගහලා දෙන්නකෝ....
හරි හරි...

කියමින් ඇය ගෙම්බාට ඉදිරියෙන් කතිරය ගැසුවාය. ඇය ගැන සැක සිතුනු ආච්චී වහාම පත්‍රය අතට ගෙන දෑස් ළං කර බැලුවාය.

"මේ ගෙම්බාටනේ ගහලා තියෙන්නේ ළමයෝ... මම කිව්වේ ඇඳ කියලනේ..."

කියමින් උච්ච සංඛ්‍යාත නගන්නට විය. මේ පිළිබඳ ආරංචිය ලැව් ගින්නක් සේ පැතිරුන අතර ආච්චී ඇඳටද කතිරය ගස්සවා ගෙදර ආවාය.

ඔන්න ඔහොමයි මේ පාර අපේ ආච්චී ඇයේ මනාපය ලකුණු කළේ...