December 29, 2010

දන්නෝ දනිති

දන්නෝ දනිති
නොදැදැනගත යුත්තෝද දනිති

නොදන්නෝ නොදනිති
දැනගත යුත්තෝද නොදනිති


මෙය සියල්ලෝම නොදනිති

December 22, 2010

ප්‍රියාවිය, සබඳ

සංසාරයේ ඈතක
එක්ව බැඳී ආ
ගමන් දුර ගෙවා
සංසිඳුවා විඩා ගත
කතරට වට පිනි පොද
සිසිලස සමග
මද නල
තෙමා ගත සිත
පුබුදුවා මනදොළ
යන්නට සවිය විරිය
දෙනු මැන
ප්‍රියාවිය,
සබඳ...

December 6, 2010

සිත බිඳුනා නෙමෙයි බිඳවා ගත්තා...

ගත රිදුනා නෙමෙයි
           රිදවා ගත්තා...
සිත බිඳුනා නෙමෙයි
           බිඳවා ගත්තා...
හද ඉරුනා නෙමෙයි
           ඉරවා ගත්තා...
මට ඇඬුනා නෙමෙයි
           අඬවා ගත්තා...

November 26, 2010

එන්නද එපාද?

එන්නද එපාද?








මේ කියලා තියෙන්නේ හොරෙන් එන්න කියලද? නැත්නම් එන්න එපා කියලද? මට හරියටම තේරුනේ නැ. ඒ කොහොම උනත් මේ දැන්වීම තිබුණේ ප්‍රසිද්ධ බෙහෙත් ශාලාවක.
කොහොමද අපේ සිංහල....



November 3, 2010

සිනාසෙන්නේ මෙහෙමයි














විශේෂ ස්තුතිය: ජනකයට
 

October 27, 2010

අපේ කළු සූටි



මෙතන ආරස්සාව හොඳයි වගේ. කාටවත් පේන්නෙත් නෑ. අප්පට සිරි. අර මොකාද අර? ම්..ම්...
නියම දඩයම් වෙලාව. පොඩ්ඩක් දුවන්ඩ දීලා එලවනවා. කිසිම ගතියක් නෑ එක පාරම අල්ලගත්තොත්...
ඔන්න කාටවත් කියන්න එපා මන් මෙතන ඉන්නවා කියලා....





ගේ ඇතුලේ හරිම රස්නෙයි. මෙතන නියම පොට් එක.
මම යෝජනා කරනවා හැම පූසෙකුටම මෙවැනි මල් පෝච්චිය බැගින් දෙන්න ඕනෑ කියලා


අර මොකාදා ඒ පාර. පොඩි ලේන් පැටියෙක් නේද?
මම ඕවා ගනන් ගන්නේ නෑනේ. මට හෙන නිදිමතයි.
අනික මම හරියට දැක්කෙත් නෑ මොකාද කියලා.
(වරෙන්කො කිට්ටුවට දෙන්න තොට.....)

October 25, 2010

දුන්නා ලේ බිඳු මෙන්න මෙහෙමා

පහුගිය සතියේ සිකුරාදා අපි ගියා කළුතර බෝධියට. මමයි බිරිඳයි පුතයි. අපි තුන්දෙනා එක්ක තව නෑදෑ පිරිසකුත් හිටියා. පෝය දවස හින්දා සිල්ගත්ත උපාසක උපාසිකාවන් වගේම බෝධිය වඳින්නත් ගොඩාක් අය ඇවිල්ලා හිටියා. ඒත් එක්කම එදා අයිටීඑන්(ITN) එකෙන් පෝදා වැඩසටහනකුත් සංවිධානය කරලා තිබ්බා.

අපි සුපුරුදු විදියට මල් පූජා කරලා, පහන් පත්තු කරලා හඳුන්කූරු දල්වලා එහෙම පන්සිල් අරගෙන බොදු සිරිත් විරිත් අනුව සිටියා. ඒත් එක්කම මම දැක්කා ලේ දං දීමේ වැඩසටහනක් තියෙනවා. අපි ආවේ අර නෑදෑ කට්ටියක් එක්ක නිසා මන් ඇහුවා කවුරුවත් ඉන්නවද ලේ දෙන්න කැමති කියලා. මොකද මම විතරක් නම් අනිත් අයට පරක්කු වුනොත් එහෙම හරි නෑනේ කියලා හිතුන හින්දා.

අනේ බලනකොට එක නංගී කෙනෙක් හරිම ආසාවෙන් ඔව් කිව්වා. මටත් ෆිට්. අවාසනාවට බිරිඳට ලේ දෙන්න විදියක් නෑ. එයාට තියෙන අසනීප තත්වයක් හින්දා. ඉතින් ඔන්න ඔහොම සෙට් වෙච්ච පාර මමයි අර නංගියි දෙන්නම ලේ දීලා අපේ ඔක්කොටම පිං සිද්ධ වේවා කියලා හිතාගෙන ගෙදර ආවා.

ලේ ගන්න තැන හිටිය නර්ස් නෝනා නම් හරිම ලස්සනයි.


මා වැනි                          බිලින්දා
මරුවා යයිද                   කැන්දා
අනේ ඒ                          හින්දා
දෙන්න ලේ බිඳු මාමා  නැන්දා



අනේ පොඩි               බිලින්දා
යන්නේ කෙලෙස       කැන්දා
අපි ඉන්න                   හින්දා
දුවයි මරුවා හෙට     අනින්දා





October 18, 2010

ඉදිරියටම යව්




නෝර්වේ රටේදී (සොන්ග්ස්වාන්)
2009 මැයි 1 වැනිදා 

October 15, 2010

අපේ ගෙදර - 3

ඔන්න දැන් අත්තිවාරමේ වැඩේ නැගලා යනවා. පස් කැපිල්ල ඉවරයි. දැන් තියෙන්නේ කොනක ඉඳලා හිටු කියලා අත්තිවාරම බඳින එකයි. එක උපදේශයක් දෙන්නම්. ගෙයක වැඩ පටන් ගන්න කලියෙන් බඩු නම් ලෑස්ති කර ගන්න වෙනවා. දන්නවනේ බාස් මාමාලගේ වැඩ. එයාලා කවමදාවත් කලින් කියන්නේ නෑ.

මේක ඕනෑ වෙනවා.
අරක ඕනෑ වෙනව කියලා. වැඩේ කරන්න ගිහින් වැඩේ හිරවෙනකොට කියනවා 
මේ අරක තිබ්බ නම් තමා හරි.
මේක නැතුවම බෑ.....

දාහක් දේවල්. ඔන්න ප්ලෑන් එකේ තිබ්බ විදියට මම් බඩු එකතු කරන්න ගත්තා. ආ තව එකක්. එක පාරම ගිහින් හාර්ඩ්වෙයාර්වලින් බඩු නම් ගන්න එපා. ඉස්සරලාම යන්න ප්ලයිට් ටුවර් එකක්. ගිහිල්ලා ඉල්ලන්න කොටේෂන්. තව එකක්. ඔය හාඩ්වෙයාර් බුවාලා ලේසි අයනම් නෙමෙයි. එයාලා මුලදී බිස්නස් එක අල්ලාගන්න අඩුවෙන් ගනන් කියනවා. ඒ කියන්නේ අපිට ගෙයක් හදනකොට ඉස්සරලාම ඕනෑ වෙන්නේ සිමෙන්ති, කලු ගල් හා වැලිනේ. ඉතින් මෙයාලා මේවා ටිකක් අඩුවෙන් දෙන්න බලනවා. පස්සේ හිමීට කම්බි, ඇණ, තීන්ත, පොටි වගේ දේවලින් ගේම දෙනවා. පරිස්සමින් ඔන්න. මම නොකිව්වයි කියන්නෙපා හරියැ...


මමත් සුපුරුදු විදියට ගිහිල්ලා හාර්ඩ්වෙයාර් කිහිපයකින්ම කෝටේෂන් ඉල්ලුවා. ගෙදර ඇවිල්ලා ඔක්කොම පිළිවෙලකට තියලා සංසන්දනය කරලා බැලුවා. සමහර කඩවල වැලි රුපිල 100ක් වැඩියි. තව ඒවාගේ සිමෙන්ති රුපියල් 5ක් වැඩියි. ඉතින් මමයි රැජිණයි එකතුවෙලා සාකච්ඡා කරලා කරලා කරලා... ආයෙත් කරලා එක කඩයක් තෝරා ගත්තා. ඔයාලට කියන්න තව කාරණයක්. 

මේක පස්සේ වෙලාවක පත්තු  වුනේ. මම අර කිව්ව එක කඩයක වැලි ගනන් ඇහුවාම කිව්වේ මම බඩු ගන්න තීරණය කරපු කඩේ ගානට වැඩියෙන් රුපියල් 50ක් අඩුවෙන්. ඒත ගන්න ගියාම පැටවුම් කුළිය කියලා රුපියල් 100ක් එකතු කරාපි. දැක්ක නේද මුන්ගේ තියෙන කපටිකම. ඒක හින්දා ඔන්න ආයෙත් පරිස්සමින්. මිළ ගණන් අහනකොට අහන්න ඕනෑ ගෙනල්ලා බාන්නම ගාණ කීයද කියලා. නැත්නම් ඉතින් හිමීට අපිට තට්ටු වෙනවා. මම මේ කතාව දැන්ගෙන හිටියේ නෑ. ඒත් මගේ වාසනාවට අර කඩේ මිළ කියලා තිබ්බේ ගෙනල්ලා බාන්නත් එක්කමයි. 

මේ ගැන කියනකොට තව එකක් කියන්න ඕනෑ. ඔය කඩවල තියෙන ලොරි ගැන. මුදලාලි කියන්නේ කියුබ් 1 1/2 ලොරිය කියලා. නැත්නම් කියුබ් 4 ලොරිය. බලපුවාම ඇත්තටම තියෙන්නේ කියුබ් 1 1/4යි. නැත්නම් කියුබ් 3 1/2යි. ඉතින් ඒකත් හිතට ගන්න. මේ වගේ එක එක ගැට තියෙනවා. (මට ඉගෙන ගන්න පුලුවන් වෙච්ච,ගොඩ දාගත්ත වගේම අහු වෙච්ච ඒවාත් ඔයාලත් එක්ක මෙහෙම කියන්නම්කෝ මේ කියන ගමන්.)


අර කලින් කිව්ව පයිලට් ගමනින් පස්සේ ඉතින් මමත් බඩු ටික ටික ලෑස්ති කර ගත්තා. ඔන්න ඉස්සරලාම කළු ගල්. මේවට කියන්නේ හයේ හතරේ කියලා. අත්තිවාරමේ පතුලට මේවා තමා දාන්නේ. ඊළඟට වැලි. වැලි කිව්වා ජාති දෙකයි. ගඟේ වැලියි මූදු වැලියි. මම නම් තෝරා ගත්තේ ගඟේ වැලි. ගාන නම් වැඩියි ටිකක්. මට ෂුවර් එකක් තිබ්බේ නෑ ඔය මූදු වැලි ගැන. ඉතින් හිතේ කොස්සක් තියාගන්න ඕනෑ නැති හින්දා මම එහෙම කරා.

ඒක හරිම වැදගත්. ගෙවල් හදනකොට  ඔය පොඩි පොඩි සැක සංකා නම් තියා ගන්න එපා. අන්තිමට ඕවා කැරකිලා එනවා. හදා ගන්නත් බෑ.... විඳව විඳවා ඉන්න තමා වෙන්නේ.

ඊළඟට  සිමෙන්ති. මෙතනදි නම් බාස්ගෙන් අහන්න වෙනවා මොන ජාතියද ඕනෑ කියලා. නැත්නම් ගෙනාවම කියනවාඅර ජාතිය තමා හරියන්නේ. වැඩේ හරියට යන්නේ නෑ. යාදෙන්නේ නෑ. වේලෙන්න වෙලා යනවා. පාට හරිනෑ... දාහක් දෙවල් කිය කිය වැඩේට බනිනවා. ඒක හින්දා බාස්ට බෝලේ පාස් කරන්න අමතක කරන්න එපා. ඒත් බලාගෙන පරිස්සමින්. දන්නවනේ .. එයලා බාස්ලා.... මොකද කොන්ක්‍රීට් වැඩ වලට ටොකියෝ සිමෙන්ති, අනිත් වැඩට සංස්ථා කියලා තමයි ප්‍රසිද්ධිය. දැන් මෙටල්. ඒවට කියන්නේ 3/4 කියලා. ඔන්න ඔය විදියට අත්තිවාරම කපලා ඉවර වෙනකොට බඩු ටිකත් හිමීට ලෑස්ති කර ගත්තා. දැන් හරි.

එහෙනම් බලමු ඊළඟට කරන්නේ කියලා...

October 14, 2010

කිරි ඉතිරවීම හා පත්තිනි කතාන්දරය

මෙය ජනප්‍රවාදයේ එන කතාවකි.

පත්තිනි දේවිය හා පාළඟ කුමරු යන දෙදෙනා එකල බොහෝ ආදරයෙන් ජීවත් වූ දෙදෙනෙකි. එකල රජකම් කල පඬි රජ විසින් සළඹක් සොරා ගත්තායැයි කියමින් පාළඟ කුමරු මරා දමනු ලැබීය. මේ වියෝවෙන් වියරු වැටුනු පත්තිනි දේවිය ගෝපුර පිහිටි රජ මාලිගාව ඉදිරියේ සිට රජුන්ට පළි ගසන්නට විය. මෙයින් උදහස් වුනු රජ "තීට තොගේ තන කවමි" යැයි කියමින් තර්ජනය කරන්නට විය. සිහි විකල්ව සිටි පත්තිනි දේවිය තම වම් තනය කඩා රජුටත් රටටත් ශාප කරන්නට විය. මේ ශාපය හමුවේ මුළු මාලිගාවම ගිනි ගෙන දැවෙන්නට විය. රටටද ගින්න පැතිරුනයෙන් එරට වැසියෝ එක්ව දෙනුන්ගෙන් කිරි දොවා හිරු දෙවියන්ගේ නාමට කිරි ඉතිරිවීය. හිරි දෙවියන් ඉතා බලවත් වූයෙන් එම ගින්නෙන් මදුරා පුරය බේරාගත් බව ජනප්‍රවාදයේ කියැවේ. මෙලෙස හිරු දෙවියන් වෙනුවෙන් කිරි ඉතිරවීම ආරම්භ වූවායයි ජනප්‍රවාදයේ සඳහන් වේ.


කෙසේ නමුත් මහා ව්‍යසනකින් ආරක්ෂාවීමට මේ කිරි ඉතිරවීම කරන්නට ඇත. අදටත් මිනිස්සු දෙවියන් වෙනුවෙන් කිරි ඉතිරවීම යම් යම් ව්‍යසන හමුවේදී කිදු කරන බව ප්‍රකට කරුණකි.

පිංතූරය


ඇයිද කියා

සිනිඳු මල් පෙත්තක
සුන්දර බවට
අයිතිය
කියාපාන්න
බැරි බව දැන දැනත්
ඒ සුන්දරත්වයම
රස විඳින්න තරම්
මගේ හිත
පොපියන
හැටි දැක්කම
හිතුනා
යළි යළිත්
ඇයිද වසඟ
මගේ සිත්මල
නුඹේ පහසට

October 13, 2010

ඔවුන්ගෙන් පළමුවැන්නා නැවතත් හිරු දකී

ඔවුන්ගෙන් පළමුවැන්නා නැවතත් හිරු දකී.

October 8, 2010

ඔක්කොටම කලින් ඒක වහන්න ඕනෑ

මේක නම් පුංචි පහේ ෆන් කතාවක්. සිද්ධිය උනේ මීට අවුරුදු කිහිපයකට කලින්, අපි පේරාදෙණිය විශ්ව විද්‍යාලයේ ඉගෙන ගන්න කාලේ. මන් හිතන්නේ අපි හිටියේ 3 වසරේ. දවසක් අපි සෙට් උනා රෑ පානක අක්බාර් පාලම උඩ පොඩි අඩියකට. ඔන්න ටිකක් වැදීගෙන එනකොට කශ්ටියට මතක් වෙනවා අතීත කතන්දර. එකෙක් මෙන්න මෙහෙම කියපි.

දවසක් අපේ බෝඩිමේ අන්කලයා කුණු වෙන්න ගහලා ආවා. ඇවිල්ලා මේකා ඔක්කොම කැම්පස් එවුන්ට බනින්ඩ ගත්තනේ. සුද්ද සිංහල එහෙන් යනවා මෙහෙන් යනවා. බලනකොට අද පිකට් එකක් හින්දා පාර බ්ලොක් වෙලා. මිනිහට බස් එක පරක්කු වෙලා මොනවද බඩු වගයක් ගන්න තිබිලා. කඩේ වහලා හින්දා මිනිහට නහුතෙට නැගලා...

ඉතින් හරිනේ බන්.. මිනිහට මල පනින එක නේද බං... තව එකෙක් කියාපි.

නෑ නෑ.. බන්... මේකනේ සීන් එක...
මේක බනින්නේ අපේ කැම්පස් එකට නෙමෙයි...

එහෙනම්...

මේකා කියනවා මෙහෙම.
මේ ඔක්කොම මගුල් අර අනතර් විශ්ව විද්‍යාලේ හින්දා. ඉස්සරලාම ඒක වහන්න ඕනෑ. උන් ඔක්කොම ගෙදර යවන්න ඕනෑ...
හී හී...
බු හාහා..
හික්ස්.. හික්ස්...

අපි ඔක්කොටම හෙන හිනා....
අන්තරේ කියනනේ කැම්පස් එකක් කියලා මිනිහා හිතාගෙන ඉන්න ඇති.
මොකද ඔය ඔක්කොම පිකටින් වලට මූලිකත්වය අරගෙන වැඩ කරන්නේ ඒක නේ.
අනික රූපවාහිනියෙත් කතා කරන්නේ අන්තරේ සභාපති, ලේකම්.... වගේ අයනේ...

එදා ඉඳලා අපි මොනවා හරි පිස්සුවක් කරන්න ගන්න කොට අන්තරේ ගැන කියලා හිනා වෙනවා....



(කොහොම උනත් එදා සෙට්විල්ල නම් මැක්සා... )





හිනාවෙන කැල්ල දාල තියෙන්නේ හොයාගෙන හිනා වෙන්න හොඳේ...




October 5, 2010

අපේ ගෙදර - 2


පෙබරවාරි 9වැනිදා පටන් ගත්ත හරි ළිඳේ වැඩේ දවස් 3කින් විතර ඉවර කර ගත්තා. ඒ එක්කම වාගේ තව නැකතක් තිබ්බා පෙවරවාරි 12වැනිදාට. කට්ටිය නම් කියන්නේ පෙවරවාරි අඩු මාසේ කියලා. දන්නවනේ කෝණ මාස ගැන. එක අවුරුද්දකට කෝණ මාස 4ක් තියෙනවා. ඒ ඒ මාසවලදී ගෙවල් හැදීමෙන් එක එක නරක ප්‍රතිඵල ලැබෙනවා කියලා වාස්තුවේ තියෙනවා. එතකොට ඉතුරු වෙන්නේ තව මාස 8යි. දෙසැම්බර් කියන්නේ අවසාන මාසය කියලා ඒකත් අතාරිනවා. පෙබරවාරි අඩු මාසේ කියලා ඒකත් අතාරිනවා. දැන් තව 6යි තියෙන්නේ. මාර්තු කියන්නේ සිංහල(ඇත්තටම නම් බෞද්ධ මාස ක්‍රමයට ) මාස ක්‍රමයට  අවසාන මාසයයි. එතකොට ඒකත් අහකට. මේ සමහර මාස අර කෝණ මාසවලටත් අහුවෙනවා. ඒ කොහොම උනත් අවුරුද්දෙන් 1/2ට වැඩිය අතාරීන්න වෙනවා මෙහෙම උනාම. ඔය මාස අතඇරලා වැඩ පටන් ගන්න හදනකොට ඔන්න තියාගෙන හිටෛය සොච්චම වෙන මොකකට හර් වියදම වෙලා. ඉතින් ආයෙත් හම්බ කරන්න වෙනවා. ඔන්න ඔහොම යනකොට මේක කෙරන්නෙම නෑ....

මම 100%ක්ම ඕවා පිළිපදින්නේ නැති හින්දා සුභ වෙලාවක් බලලා වැඩේ පටන් ගන්නයි හිටියේ. අපේ කපු මහත්තයාට අනුව පෙබරවාරි මාසේ 12 වැනිදා එල නැකතක් තිබ්බා. මම කිව්වා මගේ කේන්දරේට හරියන විදියට කස්ටමයිස් නැත්නම් හදලා දෙන්න කියලා. ඔන්න ලොකු ලොකු ගණන් වගයක් හදලා රැජිණගේ කේන්දරේත් අරගෙන වෙලාවල් බලලා සිල්ප දාලා නැකතක් හදලා දුන්නා. ඔන්න ඉතින් අපේ ගෙදර කස්ටියයි රැජිණගේ ගෙදර අයයි සෙට් උනා වැඩේට.

දැන් ඉතින් තියෙන්නේ අඩුම කුඩුම හොයා ගන්න එක. අපි හිටිය කුලී ගෙදර තිබුණා පැල පොල් ගහක් අඩි 15ක් විතර උස. ඉතින් හවස් ජාමේ කලිසම් කොටයකුත් දාගෙන නැග්ගා. අම්මේ තියෙන අමාරුව. ඉස්සර නම් මේවා කිරි කනවා වගෙයි. සුටුස් ගාලා ගහ මුදුනේ. දැන් බඩ වදිනවානේ,, හික්ස්.... අනේ ඉතින් ඔය කොහොමහරි ගහට බඩගාලා බැලින්නම් යාන්තම් එළියට පැනපු ගොබයක් තිබ්බා. මගේ වෙලාව තමා. නැත්නම් ඉතින් තවත් රෑ වෙනකන් ඉන්න වෙනවනේ... ඒකත් කපාගෙන හිමීට බැස්සා. ඊට පස්සේ කඩේ ගිහින් කට්ටකුමන්ජල්, හඳුන් කූරු, සුවඳ කුඩු, බුලත්,.... යනාදී ලැයිස්තුවක්ම සෙට් කර ගත්තා. මට අලුතෙන්ම ගිණි කබලකුත් ගන්න උනානේ. 

ඔන්න ඔය විදි‍යට ඔක්කොම බඩු සෙට් කරගෙන 12 වැනිදා දෙයියනේ කියලා වැඩේ පටන් ගත්තා. පළවෙනි පස් පිඩ කපන්න එක නැකතක් තිබ්බා. පස්සේ මුල් ගල තියන්න වෙනම නැකතක්. ඒ නැකත තමා ලොකු එක. මුල් ගල තියන්න ඕනෑ පයට පෑගෙන්නේ නැති තැනකත වෙන්න. ඒ කියන්නේ ලොකු බිත්තියක් ගාවින් වගේ. දොරක් එන තැනක තියන්නේ නෑ. ආ කියන්න අමතක උනානේ, ඊට කලින් නූල් අදිනවා. ප්ලෑන් එකේ විදියට ඒක බලාගෙන නූල් අදිනවා. කූඤ්ඤ ගහනවා. පලවෙනි කූඤ්ඤය ගහන්න ඕනෑ ගෘහ මූලිකයා. ඉතින් ඔන්න නූල් ඇදලා කූඤ්ඤ ගහලා පස්සේ නූල් වෙනුවට ලණු අදිනවා.කපු මහත්තයා ඔය වැඩ යන අතරේ මොනවදෝ මන්ත්‍ර වගයක් කියවනවා. අපේ මල්ලී දුම්මල, සුවඳ කුඩු අල්ලනවා. තව කෙනෙක් වත්ත වටේටම පිරිත් නූල් අදිනවා. තවත් සමහරු නම් ෂේප් එකේ බඩ කට පුරවා ගන්නවා. මගේ නම් හිත පිරිලා තිබ්බේ. ඒත් එක්කම හිතේ ලොකු බරක් තියෙනවා වගේ දැනුනා. හරියට අපි බැඳපු දවසේ වගේ. ලොකු වැඩක් නේද මම මේ කරන්න ගත්තේ කියලා. දෙකම ලොකු වැඩනේ...

ඔන්න ඔය විදියට වැඩේ පටන් අරගෙන කට්ටිය සමගියෙන් විසිර ගියා. අත්තිවාරම් කැපිල්ල පටන් ගත්තා. දවස් කිහිපයක් වැඩේ කරන්න තියෙන හින්දා අපේ ලොකු බාස් උන්නැහැ හිමීට මාරු උනා. දන්නවනේ මේසන් බාස්ලගේ වැඩ. මෙයා නම් අපේ නෑදෑ කෙනෙක්. ඒක හින්දා බනින්නත් බෑ. හික්ස්.... ඔහොම ඔහොම යනකොට ඔන්න අත්තිවාරම කපලා අහවරක් උනා හරියටම පෙබරවාරි 14 වැනිදා වෙනකොට. ආ එදා අපේ තාත්තගේ උපන් දිනේනේ. ඒත් තාත්තා හිටියේ අඹන්පොල. ඒක හින්දා සාජ්ජේ කෝල් එකකට සීමා උනා. මට හරිසතුටුයි. මටත් වැඩියෙන් සතුටුවුන කෙනෙකුත් හිටියා. 
දන්නවනේ කවුද කියලා...


October 3, 2010

අපේ ගෙදර

ඔන්න එකෝමත් එක කාලෙක ඒ කියන්නේ 2009 ජනවාරි මම පොඩි වැඩකට සෙට් උනා. දැනට අවුරුදු 1 1/2කට වැඩියි. මම අලුතෙන් ගත්ත ඉඩමේ වැඩ පටන් ගත්තා. ඉඩම් නිකන් තියන්නද නේද? ඒ හින්දා මම හිතුවා පැල් කොටයක් අටවන්න ඕනෑ කියලා. මෙහෙම හිතලා ඔන්න ගියා ගෙවල් වල පිංතූර අඳින ගෑණු ළමයෙක් ගාවට. ඉතින් මම විස්තරේ කිව්වා. මෙන්න මෙහෙමයි ඉඩම් කෑල්ල. ඉස්සරහින් මෙහෙම කන්ද. පස්සෙන් මෙහෙම වෙල. වම් පැත්තෙන් අරක. දකුණු පත්තේ මේක.  මේ විදියට අර ළමයට කිව්වා ඉඩමේ විස්තරේ. මෙහෙම කියලා ඉඩමේ ප්ලෑනේ කොපියකුත් දුන්නා. දැන් එයාගේ වාරේ. ඔන්න පටන් ගත්තා අතුරු ප්‍රශ්න වාරය.



දැන් ඔයාගේ මාස්ටර් බෙඩ් රූම් එකේ සයිස් එක කීයද, කාර් පාර්ක් එක කොතනද, සර්වන්ට් බාත් රූම් එක කොහෙද... කියලා අහන්න ගත්තේ නැතැයි...

අම්මෝ.. අහපු පුරශ්න ගාණ.. ම‍යැ අම්මේ... මට ගෙවල් හැදිල්ල එතනම එපා වුනා.. මොනා කරන්නද... මං දන්න විදියට උත්තර බැන්දා. අනික හෙන කඩු වචන, ඒවා එයාගේ භාෂාවේ තියෙන එව්වා හින්දා මට ආයේ ආයේ අහන්න උනා ඒ මොකද්ද ඒ.. ඒක කොහාට හයි කරන එකක්ද (බලනකොට ඒවා හයි කරන ඒවා නෙමෙයි. හික්ස් ) මේ වගේ අල කලංචියක් තමා එදා සිද්ධ උනේ. ඔන්න දන්න විදියට සිල්ප දාලා මම එතනින් මාරු උනා. ඉතින් ඔන්න සතියකින් විතර පස්සේ ආයෙත් ගියා ඒ ගෑණු ළමයව බලන්න. මේ පාර මන් තනියම ගියේ නෑ.. රැජිණවත් එක්කගෙනම ගියා.. (එයා දස්සයනේ...)

ඉතින් ගිහිල්ල බැලුවා මොකද්ද කරලා තියෙන්නේ කියලා. එයා විස්තරේ කියනවා. මෙතනින් හුළඟ ඇවිල්ලා මෙතනින් මෙහෙම යනවා. ඉර එළිය මෙතනින් එන්නේ.... ඔන්න ඉතින් රැජිණගේ වාරේ... මේක බැරිද මෙහෙම කරන්න. මෙතන නිකන් මල් පෝච්චි පෙලක් තියන්න. මෙතන ලොකු පින්තූරයක් එල්ලන්න පුලුවන් වෙන්න බිත්තිය එහාට කරන්න...

අම්මෝ.. අම්මෝ... මට ආයෙත් ගෙවල් හැදිල්ල එපාවුනා...

දෙන්නගේ කතාව නැගලම යනවා.. මට හරි ජොලි. ඉතින් ඔහොම දවස් ගානක් ගිහින් ගිහින් අන්තිමට එයා මොකද්ද එකක් ඇඳලා දුන්නා. මට ඕනෑ විදියට තිබුනේ ලොකු සාලෙයි (ෆුල් ආතල් එකේ මැච් එකක් බලන්න.. ෆිල්ම් එකක් බලන්න...) රූෆ් ටොප් (සෙට් වෙන්න මිසක් වෙන මොකටද..) එකයි විතරයි. අනිත්වා මොනවගේද කියලවත් හිතුවේ නෑ... ඒවා රැජිණට ඕනෑ විදියට කර ගන්න ඉඩ දුන්නා, නැත්නම් ඉතින් දන්නවනේ ගේ හදලා ඉවර උනාම ඉන්න වෙන්නේ නෑ... (එයාට කියන්න එපා හරිද... එහෙම උනොත් මන් කාලා හමාරයි...)

ඉතින් ඔය කොහොම කොහොම හරි ප්ලෑන් එකේ වැඩේ අහවර කර ගත්තා. දැන් තියෙන්නේ හිටු කියලා හදන එකයි. ඒත් එහෙම කොහොමද. දැන් වාස්තු වාරය. ඔන්න වාස්තු විද්‍යාවට අනුව ජනෙල් දොරවල් වෙනස් වෙන්න ගත්තා. බිත්ති වෙනස් වෙන්න ගත්තා. තවත් කිහිප සැරයක්ම ඔය විදියට ප්ලෑන් එක වෙනස් උනා. අන්තිමට 70-80%ක් විතර වාස්තු හරි යන විදියටයි නෝනට ඕනෑ විදියටයි මටත් පොඩ්ඩක් ඕනෑ විදියටයි ප්ලෑන් එක අහවරයක් කර ගත්තා.

ඔන්න හාපුරා කියලා වෙලාවක් කාරිය බලලා ලිඳක් කපන්න ගත්තා. ඉස්ස්‍ර සිරිතට වාගේ ඉඩමක ඉස්සරලාම ලිඳක් කපන්න ඕනෑනේ. දැන් කාලේ මෙහෙම ලිං කැපුවොත් නියෙමෙට තියෙයි. ඒත් මගේ ඉඩමේ අවුලක් උනේ නෑ. ඔන්න 2009 පෙබරවාරි 9 වැනිදා උදේ වැඩේ පටන් ගත්තා. සුමිත් කියන හාදයා තමා ලිං මාස්ටර්. ඔන්න එතනත් මට ගැටළු ආයෙත්. ලිඳේ සයිස් එක එහෙම නැත්නම් විශ්කමභය කීයද යන වග. මට හිතුන ගාණක් ඒ වෙලාවේ කියලා දැම්මා. මෙන්න මේ වෙලාවේ ගෙයි ගිණි කතුරට අහු නොවෙන්න ලිඳ කපාගන්න මම සැලකිලිමත් උනා. නැත්නම් ඉතින් දන්නවනේ අපේ අයගේ වැඩ කිඩ... දවස් තුන්කින් මිනිහා ලිඳ බඹ 2 1/2ක් කැපුවා. කට්ට පොළව. ඒත් අනේ සටස් ගාලා වතුර ආවා. ඉතින් මේ වතුර ඉස්සරලාම ගමේ පන්සලේ බෝධියට දාන්න කියලා අපේ මාස්ටර් උන්නැහැ කිව්වා, අපිත් අලුත් මැටි කලේකට අලුත් වතර අරගෙන ගිහින් බෝධිය නාවලා ඒ වතාවත් කරලා ආවා.

ඔය පින්තූරේ ඉන්නේ සුමිත් හා ලාල් (ගෝලයා). ඉතින් මෙන්න මේ විදියට තමයි මගේ ගෙදර වැඩ පටන් ගත්තේ...

September 30, 2010

කොයි එකේද ලුණු? කොයි එකේද ගම්මිරිස්?

DSC07884

රී බෝන් ද?

ඔන්න ඉතින් ආයෙත් ලියන්න කියලා හිතුනා ටිකක්.. පොඩි එකාගේ වැඩ කිඩ හින්දා වෙලාව හරිම අමාරු එකක් උනාලුනේ. ඇත්තම කියනවානම් ලියන්න උවමනාව තිබුණා, වෙලාව තමා තිබ්බේ නැත්තේ. කොහොම උනත් කශ්ටිය මාව දාල ගිහින් තිබුනේ නෑනේ. ඒකට නම් මාරම හැපී. මේ ලිපිය නම් හෙනම හෙන පුස් ලිපියක්. නමුත් එහෙම එකක්වත් ලියන්න ඕනෑ කියලා හිතුනේ කශ්ටියට සෙට් වෙන්න හිතාගෙන. පුතාගේ විස්තරේ එක්ක අලුත් ෆන් සිද්ධි ටිකක් එක්ක ලියමු එහෙනම්.... කස්ටියට බුදු සරණයි.!!!

September 29, 2010

ඔබත් දැන සිටියාද?



ගොඩක් වෙලාවට අපිට සිද්ද වෙන අතපසුවීමක් ගැන තමයි අද ලියන්නේ. ගොඩාක් අය දන්නවත් ඇති. නමුත් ලියන්න ඕනෑ කියලා හිතුනා. මෙන්න මේකයි කතාව. අපිට ඔය ඉන්න ඉන්නකොට හැදෙන වාත අමාරු, මස් පෙරලීම් වගේ දෙවලදී අපි කරන්නේ කඩෙට නැත්නම් ෆාමසියකට ගිහින් මොකක් හරි ටියුබ් එකක් ගෙනල්ලා ගානවා. ඉතින් අපි ඔය ටියුබ් එක ගෙනාවහම ඒක සීල් කරලනේ තියෙන්නේ. ඉතින් ඔන්න අපි මොකක් හරි හොයනවා ඒක හිල් කරන්න. ගොඩාක් වෙලාවට හැට්ටකටු, ආය කටු කොන්ඩ කටු නැත්නම් කවකටු වගේ එකකින් අනිනවා. ඒකේ තියෙන විෂබීජ ඉස්සරලාම ඇතුලට දානවා. දැන් ඉතින් ගානවා හිටු කියලා. වෙලාවට ඔය ගොඩාක් බෙහෙත් ගාන්න පුලුවන් බාහිර විතරයි. ඒකේ ගහලා තියෙනවානේ බාහිර ආලේපනයට පමණයි කියලා. නැත්නම් අපේ අයියලා දෙයි හැමතැනටම.....

ඉතින් මම අද කියන්න හැදුවේ මේ ටියුබ් එක මූඩිය ගැන. ඒක හදලා තියෙන්නේ ඔය හිල් කරන වැඩේට. දැකලා නම් ඇති දාස් වාරයක්. නමුත් භාවිතා කරලා නැතුව වෙන්න පුලුවන්. මම මේ ළඟකදීත් අපේ නැන්දා කෙනෙක්ට කියලා දුන්නා මූඩියෙන් හිල් කර ගන්න හැටි. ඔන්න ඔය තියෙන පින්තූරේ තියෙන විදියට මූඩිය යොදාගෙන හිල් කරන්න පුලුවන් දැන් ඕන එහෙනම්. හැබැයි එකක්. මේකෙන් හැදෙන හිල නම් ටිකක් ලොකු එකක්. ඒක හින්දා පරිස්සමින් අනින්නේ හරිද? ඕන් මන් නොකිව්වයි කියන්නෙපා හිල ලොකු කරගෙන එහෙම. හා එහෙනම් පරිස්සමින් මූඩිය යොදාගෙන ටියුබ් එකේ හිල හදාගෙන පාවිච්චි කරන්න. එහෙනම් අදට ගියා.


September 24, 2010

ඒ කිසිවක් clear නැත

ලියන්න දේ එමට ඇත
වෙලාව නම් එහෙම නැත
මොකක් හරිම වෙලා ඇත
ඒ කිසිවක් clear නැත

August 19, 2010

අපේ එකාගේ තුන ඉවරයි


මළ කෙළියයි නේද? අපේ එකාගේ තුන ඉවරයි!!! තුන ඉවරනම් ඉතින් ආයේ කියන්න දෙයක් නෑ. දැන් නියම කාලේ...

හික්ස්... කාලෙකින් බ්ලොග් ලියන්නත් බැරි උනා. ඉතින් ඔන්න කොහොම කොහොමහරි වචන ටිකක් අහුලාගත්තා වෙලාවකුත් එක්ක මොනවාහරි කුරුටුගාන්න හිතාගෙන... එහෙනම් ලියමුකො බලන්න...

ඔන්න අපේ කොල්ලාට දැන් තුනකුත් (මාස ) ඉවර උනානේ. කාලය යන වේගේ... ඉතින් ඔය ගමේ විදියට කරන්න තියෙන චාරිත්‍ර වාරිත්‍ර එහෙම කළා. දන්නවනේ ඉස්සරලාම පුතන්ඩියා ගෙදර එක්කගෙන එන්න කලියෙන් ගේ ඔක්කොම සුද්ද කරලා කහ වතුර ඉහලා සුවඳ දුම් අල්ලලා.... ඔය වගේ වැඩ සෙට් එකක්ම කරන්න තිබුණා. සමහර පළාත්වල නම් ඔය මොකවත් නෑ.. මෙන්න ඉපදුනා. මෙන්න ගෙදර... හරිම සිම්පල් ප්ලෑන් එකක්.... ඒත් අපේ අම්මලා, නැන්දම්මලා හා කිරිඅම්මලා ටිකක් අරවට බරයි. මමත් ඒ කිව්ව සමහර දේවලට 100%ක් එකඟයි.

ඔයන්න ඉතින් කිරිකැටියා ගෙදර ගෙනාවා විතරයි අර කඩමණ්ඩියේ හිටිය කාන්තා පිරිසක් ආවනේ සුටුස් ගාලා... දන්නවනේ ඉතින් ගමේදී හොරෙන් කිඹුහුමක්වත් යවන්න බෑනේ... හැබැයි අපේ නැන්දම්ම දුන්නා එල කවර් එකක්... පුතාව අල්ලන්නවත් දුන්නේ නෑ. උඩින් බලලා යන්න කිව්වා... මොකද කියලා දන්නවනේ... විෂබීජ කඳු, සාගර,  හික්ස්...


ඔන්න ඉතින් පුතාව ඉස්සරලාම වතුර නාවන දවස ආවා. මෙන්න අමුතු ගැජට් වැඩක් කරනවා. දන්නවාද පිණිදිය පනම් අයින් කරනවා කියන සිද්ධිය. මම නම් එදා තමා දැන ගත්තේ. පුතාට ලෙඩ රෝගාදියෙන් පිහිට ආරස්සාව දෙන්න කියලා සතරවරම් දෙවිවරුන්ට බාර වෙනවා. ඊට පස්සේ ඒ වෙනුවෙන් කාසි වගයක් වෙන් කරනවා පඬුරු විදියට. රන් තැඹිලි ගහකින් ගත්ත වේලිච්ච පොල් ගෙදියකින් අතින්ම හදාගත්තු පොල් තෙල් ටිකකුත් ගන්නවා. ඒ පොල්තෙල්වලට තවත් රසකාරක කිහිපයක් දානවා, කරපිංචා වගේ සුවඳ එන්න. ඔන්න ඔය විදියට හදා ගත්තු විශේෂ තැඹිලි තෙලට අර දෙවියන්ට වෙන් කරපු කාසි දානවා. පස්සේ කිරි අම්මා කෙනෙක් බුදුන් වැඳලා එහෙම දෙවියන්නට කන්නලව්වක් කරනවා පුතාව ලෙඩ රෝගවලින් ආරස්ස කරලා දෙන්න කියලා. එහෙම කරලා අර තැඹිලි තෙලෙන් පොඩ්ඩක් අරගෙන් ඔලුවේ ගානවා. දැන් තියෙන්නේ නාවන වෙලාව. මේකට සමහරු වෙලාවකුත් බලනවා. අපිනම් බැලුවේ නෑ. දවල් 12ට කලින් හොඳට ඉර පායපු වෙලාවක් තෝරා ගන්නවා . ඉතින් කලින් හදාගත්තු පොල්කටුවක් අරගෙන, දන්නවනේ පොල් ගෙඩියේ උඩ බෑයක් අරගෙන හිලක් හදලා එහෙම ගන්න එක, ඔන්න නාවන්න ගන්නවා. මේ අතරේ කිරි අම්මා කවියකුත් කියනවා. පළවෙනි වතුර පාරටනම් පුතා එක පාරම ගැස්සිලා යනවා. ඊට පස්සේ ගොඩ. ටිකක් උණු වතුර නිසා පුතා ඒකට කැමතියි. ඔන්න ඉන්නවා ෆුල් ආතල් එකේ. ඉතින් නාවන පොල්කටු ගාන ගනින්නත් ඕනෑ. ඉස්සරලාම 50ක් නෑව්වා. පස්සේ පස්සේ ඒක වැඩි කරනවා. ඔන්න ඔහොම තමයි පුතා නාන්න ගත්තේ...

කියන්න අමතක උනානේ. වතුරෙන් ගත්ත ගමන් දුන්නා හූව ගේම දෙකක් වෙන්න. අම්මෝ... බය හිතෙනවා.. දුකත් හිතෙනවා... සීතලට මොර දෙනකොට....

ඉතින් ඔන්න ඔය විදියට ටික දවසක් ගියා. මෙන්න ඉතින් ඉන්ජෙක්ෂන් කෝස් එක පටන් ගත්තනේ... අම්මෝ... මට දුක..ක හිතුනා. පව් අනේ.. හෙක්සා කියලා මගුලක් විද්දා... පුතා ඇඩුවා... ඒ විස්තරේ පස්සේ ලියන්නම්කෝ..
අදට මේ ඇතිවගෙයි...
ඕන් මං ගියා...

July 30, 2010

කුමුදු පින්තු මහතාට නිවන් සැප ලැබේවා!

දැන් ඔක්කොමලා වගේ මේ සෝචනීය සිද්ධිය දන්නවා.
ඒත් මගේ යුතුකමක් විදියට නොදන්න අයට දැන ගන්න එක්ක මේ ලිපිය දානවා.
මම ඔහුව බ්ලෝග් තුලදී මෙන්ම විකිපීඩියාව තුලදීත් දන්නා කෙනෙක්.


කුමුදු පින්තු මහතාට නිවන් සුව ප්‍රාර්ථනා කරමි. 

July 19, 2010

පලපුරුදු සුදු පටිකාරයකු ඕනෑකර තිබේ.

පහු ගිය දවස් ටිකේම පාරේ පුදුම වාහන තදබදයක් තිබුනේ. සඳුදා හින්දා වාහන වැඩි ඇති කියලා හිතාගෙන පහුවදා බලනකොට, මෙන්න සඳුදට වැඩියි තදබදේ. මං නිකමට වගේ බැලුවා මොකද මේ කියලා. බලනකොටනේ දැක්කේ.

මෙන්න බොලේ අලුත් කලු පටි කාරයෝ සෙට් එකක් බැහැලා. වෙනදා පාරේ වාහන හසුරවන්න හිටිය සුදු පටි කාරයෝ කෝ කියලා බැලුවා. ඒ අය පේන්න හිටියේ නෑ. ඒ වෙනුවට අලුත් අය ඇවිල්ලා. එයාලට හරිහමන් පුහුණුවක් දීලා නෑ වගෙයි කියලා හිතුනා. නිකන් විසිල් එකක් දීලා පාරට බස්සලා වගෙයි පෙනුනේ.

මං හිතන්නේ එහෙම ලේසියෙන් වාහන හසුරවන්න බෑ මේ ලංකාවේ. මොකද කියලා ඔක්කොමලා දන්නවනේ. මේ අස්සේ මට පොඩි කතාවක් මතක් උනා.

ඔන්න එක දවසක අපේ රටේ ජනාධිපති කෙනෙක් එනව කියලා පාරේ වාහන අයින් කරන්න කියලා පොලීසියට කිව්වලු. ඉතින් ඔය ලොකු ලොකු තරු තියෙන අය ඇවිල්ලා දැන් පාරේ වාහන අයින් කරන්න ගත්තලු.
මොන....
මෙන්න බොලේ වැඩේ වකූර් වෙලා ගිහින්. නලා ඔබාගෙන වාහන කාරයෝ බෙරිහන් දෙන්න ගත්තලු. ඉතින් දැන් මළ කෙලියයි. ලොක්කා එන්නත් ළඟයි. වස ලැජ්ජාව. වාහන පිරිලා. ඔන්න එක පාරම මේ එක කළු පටි කාරයෙක් නලාවක් අරගෙන බැහැලා විසිල් දෙකලු ගැහැව්වේ...
වාහන ටික සට සට ගාලා ගාල් කලාලු. ඒ කලු පටි කාරයට එතනදීම උසස්වීමකුත් දුන්නලූ.

එයා නොහිටින්න අර ලොකු අයෙගේ සායම ඔක්කොම ඉවරනේ... ඉතින් ඔය වගේ දස්ස කොල්ලොත් ඉන්නවා. නමුත් මේ දවස්වල ඉන්න අය නම් කිසි කමකට නෑ. මං කියන්නේ කරන්න කලියෙන් කරන කෙනෙක් දිහා බලාගෙන හිටියොත් නරකද .... 

මගේ තක්සේරුව:


අවස්ථාවවාහන තදබදය
කිසිම පටිකරුවෙක් නොමැති විටනැති තරම්
සුදු පටිකරුවෙක් ඇති විටසාමාන්‍යයි
කලු පටිකරුවෙක් ඇති විටවැඩියි
සුදු පටිකරුවන් කිහිප දෙනෙක් ඇති විට උග්‍රයි
කලු පටිකරුවන් කිහිප දෙනෙක් ඇති විට ඉතා උග්‍රයි
සුදු + කලු පටිකරුවන් කිහිප දෙනෙක් ඇති විට මාරාන්තිකයි.

June 27, 2010

අනේ දෙවියනේ මට වුනු වියෝයා.


අනේ දෙවියනේ මට වුනු වියෝයා
නොමැති කලට ගෙයි කිසිවෙක් මෙසේයා
නැට්ට තියා කෙසෙල් කැපූ කලේයා
කෙසෙල් කැනත් හොරු අරගෙන ගියෝයා


බිරිඳ පුතා සමග සිටින්නේ ඇගේ ගම වන කටුපොතය. මා තනිවම පිළියන්දලට වී මහා පාලුවකින් කාලය ගත කරන්නෙමි. නිවාඩුවක් ලද සැනින් මා ඇගේ නිවසකරා පියඹායන්නේ නිදහස ලද කුරුල්ලෙකු මෙනි. සෑම සති අන්තයක්ම ගත කලේ ඇගේ නිවසේය. පසු ගිය සතියේ සඳුදා මා පිළියන්දල නිවාසට පැමිණ කල යම් කිසිවක් සිදු වී ඇති බව සිතුනි. විපරම් කරමින් යන විට දුටු දේ නිසා මා හට කෝපය වෙනුවට සිනහ නැගුනි. කිසියම් කෙනෙක් හෝ කිහිප දෙනෙක් අපේ වත්තේ තිබූ කෙසෙල් කැනකට ගේමක් දීලාය.

එය කෙසේද යත්:

බණ්ඩාර වහල්ල ඉතුරුවන පරිදි කෙසෙල් ඇවරි කපාගෙන ගොසින්ය. තවද මල් ඇවරියද ඉතුරු කර ගොසින්ය. මෙලෙස ගහේදීම ඇවරි වෙන් කිරීම කෙතරම අසීරුදැයි කියා අමුතුවෙන් කිව යුතු නොවේ.

මෙය කළ තැනැත්තා කවුරුන් විය හැකිද?


June 17, 2010

අමයුරු රස මේයැයි අප සිතන්නේ

පුංචි පුතා ගිය මාසේ උපන්නේ
නිවස පුරා කිරි සුවඳයි දැනෙන්නේ
අපි දෙන්නා පුතු සමගින් සිටින්නේ
රන් කැටි පුතු හරියට එය නොදන්නේ

බඩගිනි කලට නෑ කිසිවක් සිතන්නේ
දෙකක් වෙන්න මහ හයියෙන් හඬන්නේ
ඒ හඬුමට හනිකට කිරි එරෙන්නේ
සොබා දහමෙ අරුමය මේ කියන්නේ

බඩ පිරුනම මොකවත් නෑ කරන්නේ
පැය දෙක තුන එක පාරම නිදන්නේ
නිදන සිරිය අපි දෙන්නම විඳින්නේ
අමයුරු රස මේයැයි අප සිතන්නේ

හොරෙන් හොරෙන් මා දෙස ඈ බලන්නේ
ආඩමබරකමයි එතන තියෙන්නේ
කිසි වෙනසක් නෑ ඇය මට කරන්නේ
මේක තමා ආදරයයි සිතෙන්නේ



June 5, 2010

දැන් කාලේ කොට්ටෝරුවෝ





දැන් කාලේ කොට්ටෝරුවෝ ඉස්සර වාගේ මෝඩ නෑ වගෙයි පේන්නේ.

මේ බලන්න මේ පිංතූරේ දිහා...




මේ කොට්ටෝරුවා කොටන්න හදන්නේ
කෙහෙල් ගහට නෙමෙයි.
කෙහෙල් මුහේට.








බලමුකෝ ඒකෙත් හැටි. අනේ කාලේ වනේ වාසේ කිව්වලු...

June 3, 2010

අපේ පුතාගේ පළමු වීඩියෝ පටය

මෙන්න තියෙනවා අපේ පුතා මෙළොවට ආපු විදිය දැක්වෙන වීඩියෝ පටය.

මේක සමහරුන්ට බලන්න අමාරු වෙන්න පුළුවන්.
ඒක හින්දා පරිස්සමින් බලන්න.
ඔන්න බලලා මට බනින්න එපා ඔන්න...


මගේ නැන්දම්මානම් කිසි ගේමක් නැතුව මේක බලනවා. සමහර ගෑණූ ළමයි නම් පොඩ්ඩක් බය වෙනවා.







http://www.youtube.com/watch?v=2JohvMmg7Dg




http://www.youtube.com/watch?v=j4pXhoMz8sk

මේ දවස්වල බිඟුලන්තයේ ප්‍රවෘත්ති අංශය තරමක් අවිවේකී නිසා අලුත් ආරංචි ප්‍රමා බව කරුණාවෙන් සලකන්න.

May 23, 2010

අපේ පුතා මෙළොව එළිය දුටු හැටි


මේ ඉන්නේ 17 වැනිදා උදේ, ඉස්පිරිතාලේ යන්න මොහොතකට කලියෙන්...
එයා ගොඩාක් සතුටෙන් කියලා මට හිතුනා...




මෙන්න පුතා අම්මගේ බඩෙන් එළියට එන වෙලාව. තාම පෙකෙනි වැල කපලත් නෑ... 
තාමත් අම්මගෙන් තමා ඔක්කොම දේවල්...





මෙන්න අපේ ලොකු දොස්තර මහත්තයා. මෙයා තමා පුතාව එළියට ගත්තේ. 
මෙයාගේ නම Dr. S. J. B. ලෙනදොර.




මෙන්න පුතා අම්මගෙන් වෙන කරලා...





මේ ඉන්නේ අපේ එක වෙද නෝනා කෙනෙක්. ඉපදුනාට පස්සේ පුතාව උස්සගෙන දුවන්න හිතාගෙන ඉන්නේ මෙයා ළඟට තම...
මෙයාගේ නම Dr. රෝහිනී ප්‍රේමරත්න





අම්මගේ ප්‍රථම හාදුව... අඬ අඬා හිටිය පුතා එක පාරම සද්ද නැවැත්තුවා.
















ආ තව එක දොස්තර නෝනා කෙනෙක් අඩුයි මෙතන. දොස්තර රන්මලී කියලා.
ශල්‍යාගාරයේ හිටියේ එයා. මගේ කැමරාවේ නෑනේ.

May 20, 2010

අපේ පුතා මෙළොව එළිය දකී






අපේ පුතා මෙළොව එළිය දකී
දිනය: 2010-05-17

මේ ඉන්නේ අපේ පුතා. වැඩිය මුකුත් ලියන්න නම් බෑ. 
දැන් තියෙන්නේ පුතාට නමක් හොයන එකයි. ඔන්න සයිබරේ ඉන්න නැන්දලාට, මාමාලාට, අයියලාට, අක්කලාට, ආච්චිලාට, සීයලාට මෙකී නොකී සියළුදෙනාට පොඩි නෙමෙයි ලොකු වැඩක් තියෙනවා. 

මෙන්න අකුරු
ස ර ල ව ශ ෂ හ ළ
කු ස ග ජ
අඃ අං


කෝ බලන්න කස්ටිය පුතාට නමක් කියන්න දැන්....

May 16, 2010

ලිස්සන ගහක්ද මංදා

බක් මහේ අසිරිය තවම ඉවර වී නොමැත. ඊයේ එනම් මැයි 15 වැනිදා මම මගේ රෝද දෙක පදවමින් සිටියෙමි

.


ආහා!!! ...

මෙන්න තවත් එක් බක් මහ උළෙලක්. මොහොතක් මගේ රෝද දෙක නවතා බැලීමි. අමුතුම තාලේ සෙල්ලමකි. මෙය කුමක්දැයි අසල සිටි අයෙකුගෙන් විමසූ විට කීවේ එය ලිස්සන ගහක් කියාය. නමුත් අප බොහෝ දෙනා දැක තිබෙනුයේ කෙලින් සිටවූ ලිස්සන ගස්ය. නමුත් මෙය හරහට සිටවූ එකකි.

එහි ග්‍රීස් තවරා නොතිබූ නමුදු එහි ගමන් කිරීම අසීරු බව ඔබට පහතින් දැක්වෙන පිංතූර වලින් මොනවට පැහැදිළි වේද..







මෙහි අවසානයට යනවිට පුවක් ගහ වඩ වඩාත් පැද්දෙන බැවින් මෙය අසීරු බව සිතා ගට හැකිය. මා එතන ගතකල  මිනිත්තු කිහිපයේදී නම් කිසිවකු ගමන් අවසානයට නොකළේය.

May 10, 2010

බිඟුලන්තය (මිනි මැරතන් - 2010)


බිඟුලන්තය - මුහුදු තීරය

ඔන්න එකෝමත් එක කාලෙක මහා සාගරය මැද තිබුණා දූපතක්. ඒකට හැමෝම කිව්වේ බිඟුලන්තයකියලා. වෙරළ වටේ සිප්පි කටු පිරිලා හරිම ලස්සනයි. අතරින් පතර කොරල් ගල මල් එහෙමත් තිබුණා. දූපතක් හින්දා වටේම මත්ස්‍ය සම්පතත් සපිරුණ එකක් වුනා. හැන්දෑවට ඉරගල වැටෙන ඇහිල්ලට හරිම ලස්සනයි. රන්වන් පාට හිරු කිරණ මුහුදත් අහසත් යා කරන මායිමේ වැටිලා කියන්න ආසාවේ බෑ. ඒ වගේමයි උදේට තියෙන මුහුදු රැල්ල. හරිම දිග රැළි සුදු පාටට වෙරළ සිපගෙන ආපසු යන හැටි පැය ගාණක් වුනත් බලාගෙන ඉන්න පුළුවන් තරම සුන්දරයි. කොරල් අස්සට අව්ව වැටිලා එක එක පටින් දිළිසෙනවා. එක මුහුදු තීරයක්ම මේ කොරල් වලටම වෙන් වුනු එකක් විදියටයි සැලකුනේ. මේ අස්සේ පාට පාට පුංචි මාලු එහාට මෙහාට පීනලා ගියේ හරිම විනෝදයෙන්. මේ පුංචි මාළුවොත් දැනගෙන හිටියා මේ තීරයේ ලස්සන.

මහ මුහුදේ තට්ට තනිව මෙය පිහිටන්නේ
කවුරුත් මෙය හරිම අගේ කියා කියන්නේ
දූපතක් ලෙසට හරිම වටී සැවෙමො සිතන්නේ
බිඟුලන්තය කියා එයට නමක් හැදෙන්නේ

ලස්සන මේ රට වටේට මහ මුහුද තියෙන්න
වෙරළේ දිගේ තියෙන සිරිය එය පහදන්නේ
සිප්පි කටුවලින්ම පුංචි වෙරළ පිරෙන්නේ
මෙය දුටු කා කාගෙත් සිත් පිනවන්නේ

කොරල් පරයි ගල් මලුයි ගැවස තියෙන්නේ
පාට පාට පුංචි මාළු අතර සිටින්නේ
ලොකු මාළුන් මෙතනට එන්නෙම නෑ සිතෙන්නේ
පුංචි මාළු කිසි බයකින් තොරව ඉඳින්නේ

හැන්දෑවට ඉර දෙයියෝ යන්නට යන්නේ
අහස මුහුද එක් වන තැන එය සිදුවෙන්නේ
රන්වන් පැහැ අහස් තලේ පාටම ගන්නේ
හිරු දෙයියන් නැති හින්දද ඔබ දුක් වෙන්නේ

බිඟුලන්තය - දිය ඇල්ල

බිඟුලන්තය මැද්දේ තරමක ලොකු කඳු ගැටයක් තිබ්බා. මේකෙන් පුංචි දොල පාරක් පටන් අරගෙන හිමීට ගලාගෙන ගියා. මේ දිය උල්පත කවදාවත්ම සිඳුනේ නෑ. අවුරුද්ද මුලුල්ලේම වතුර ගලන්න තරම් මෙයාට හයිය හත්තිය තිබුණා. තද නියඟයක් ආව කාලෙකදී පවා මේ දිය උල්පත සිඳුනේ නෑ. පුංචිම පුංචි දිය සිරාවක් හරි ඒකෙන් මතුවෙලා ගලා යන්න තරම් වුනා. මේ දිය පහරට මගදී තවත් පොඩි දිය පහරවල් එකතු වෙලා තරමක ලොකු ගඟක් විදියට තමා මුහුදට එක වුනේ. මේ ගඟ අර කන්ඳෙන් පහලට වැටෙන එක තැනක පොඩි දිය ඇල්ලක් හදවමින් තිබුනා. මෙතන හරිම ලස්සන තැනක් වුනා. අඩි 30ක් විතර උසට වැටෙන මේ දි ඇල්ලෙන් ඒ ප්‍රදේශයටම පුදුම ලස්සනක් ගෙන දෙමින් තිබුණා. දිය ඇල්ලේ ගුමු ගුමුවයි පරිසරයේ විහඟ නදයි ඒ පැත්තම සුර විමනක් බවට කරන්න තරම් සමත් උනා.




බිඟුලන්තය මැදිවෙන්නට කඳු ගැටයක් ඇත්තේ
ඒ කන්දෙන් දොළ පාරක් හටගෙන ඇත්තේ
කවදාවත් නොසිඳෙන බව කවුරුත් දත්තේ
එකම එක බිඳක්වත් එහි ගැවසී ගත්තේ

ඈ දැන් ලොකු වෙලාය ගංඟාවක් වෙන්නේ
ඇගේ තරුණ කාලේදීම ඈ දරඳඩු වන්නේ
ගලක් දැක්කොතින් පනින්නටයි හිත දෙන්නේ
එහෙම කලාමයි ඔය දිය ඇලි ඇති වෙන්නේ

අඩි ගාණක් උඩ ඉඳලා බිමට පනින්නේ
කිසි ගාණක් නැතුව වගේ අපිට පේන්නේ
කොහොමවුනත් හරිම හැඩයි කැපිල පේන්නේ
අපි පැන්නොත් ඔහොම නොවෙයි පෙනිල කැපෙන්නේ

විහඟ නදයි ගුමු ගුමුවයි රසය මවන්නේ
සීතල පිණි බිංඳු ටිකත් එකතුම වෙන්නේ
සුදු කැටියට පෙණ බුබුලුයි මෙන්න නගින්නේ
කියන්න බැරි අසිරියකුයි ඉන් ඇති වෙන්නේ

බිඟුලන්තය - කැලය

බිඟුලන්තයේ එක් පැත්තකට වෙන්න පොඩි කැලයක් තිබුණා. මේ කැලය අලි කොටි වගේ නපුරු සත්තුගෙන් ගහන ප්‍රදේශයක් උනා. ඒ වගේම හාවුන්, ගෝනුන්, මුවන් වැනි අහිංසකයින්ද අඩු නැතුවම හිටියා. හැබැයි මේ කැලේ රජෙක් කියලා සිංහයෙක්නම් හිටිය් නෑ. මේ වනේ මැද්දෙන් අර ඉස්සරලා කියපු ගඟ ගලන්නට වූයෙන් සතුන්ට වතුරෙන් නම් කිසි අඩුපාඩුවක් වුනේ නෑ. ඒ වගේම මේ කැලයේ තැනින් තැන පොඩි දිය කඩිති තිබුණා. ඒවා අර අහිංසක මුව පොව්වන්ට දරුණු කොටින්ගෙන් ආරක්ෂාවෙලා තමන්ගේ පිපාසය සංසිඳවාගන්න කදිම තෝතැන්නක් වෙලා තිබුණා. මේ දිය කඩිති අසල ලොකු පහේ කිඹුල් රාලලාත් අව්ව තපින්නා සේ දෑස් පියාගෙන සිටියේ ගොදුරක් දැහැගැනීමට නොවේමයි කියලා කියන්න බෑ. අවස්ථාව ආව ගමන් ඔවුන් ක්‍රියාත්මක වෙලා තමන්ගේ බඩ ගොස්තරය පුරවාගන්නා බවත් මේ හිටිය අහිංසකයින් දැනගෙන හිටියා. ඒ හින්දා හැමෝම පරිස්සමින් තමා ජීවත් වුනේ. පිඹුරා, නයා, පොළඟා වගේ බඩගාගෙන යන අයත් කීප දෙනෙක්මත් මේ කැලයේ එක් පැත්තක් අයිති කරගෙන හිටියා.




ලොකු පොඩි ගස් එකතු වෙල එක කැලයක් තියෙනා
මල් පළතුරු හැම අත්තක පිරිලා තියෙනා
කුරුල්ලන්ට ගී ගයන්න තුරු මුදුනින් සරනා
සුරපුර වන් මෙවන් තැනක් කොහිදැයි සිතෙනා

කුරුළු කැදලි අතු අග එක එක සැදෙනා
ටික දොහකින් ඒවායින් ගී හඬ ඇසෙනා
කුරුළු පැටව් දෙමා පියන් සතුටින් සිටිනා
සොඳුරු දසුන් කාගෙත් මන දොල පිනනා

පුංචි පැටව් බේරා ගන්න කැදැල්ලේ සිටිනා
දෙමාපියන් සෑම විටම අවදිව ඉන්නා
උකුසු රජා මේ කිසිවක් ගනනට නොගෙනා
පුංචි පැටව් එක කටටම ගිලගෙන යන්නා

උකුස්සාට නොපෙනෙන්නට කූඩුව තනනා
කුරුළු මවක් සිතා සිටී අනතුරු නොවෙනා
ගැරඬි ආදී උරගයින්ගේ උෂ්ණය දැනෙනා
අනේ අපිට මොන සරණක් හදවත කියනා


බිඟුලන්තය - සිවුපාවෝ


නපුරු රුදුරු කොටියන් ගැවසී ගත්තේ
මහ විශාල අලියන් හැම තැන ඇත්තේ
මීට නපුරු වලසුන් නම් මෙහි නැත්තේ
හරිම දරුණු අය නම් පිරිලා ඇත්තේ


දරුණු අයට විතරක් නොව මේ කැලය
මුව පොව්වන් හා පැටවුන් එක රැලය
සිත් සේ දුවන්න්ට එහෙ මෙහෙ නලිය
රැදුනේ මේ තුරු අතරයි රඟ කෙලිය


කැලේ රජා කියනා සිංහ බොලන්නේ
නපුරු නෑලු බඩ පිරුනම කියන්නේ
කෙසර තියෙන අය හරි අඩුවෙන්නේ
කිසිම එකෙක් හිටියේ මේ පෙදෙසෙන්නේ


තැන තැන තියෙන දිය කඩිතී හරිම අගෙයි
කැලේ අයට පිපාසයට සුවය ගෙනෙයි
කිඹුල් රාළ මේ අසලම තපස් රකියි
අවස්ථාව ආව ගමන් සීලේ කැඩෙයි




බිඟුලන්තය - කැලය (IV) - උරගයෝ





පිඹුරා නම් අහිංසකයි කියන්නේ
එයා නෑනේ එලවාලා හපන්නේ
වෙලාගත්තොතින් මේ අහන්නේ
ඇට කුඩුවෙලයි ඌ මැරෙන්නේ

නයා නෑලූ බොරුවට ඔය පුප්පන්නේ
පුප්පනකොට පෙනේ හොඳට පේන්නේ
දෂ්ඨ කලොත් වැඩි වෙලා නෑ ඉඳින්නේ
ඌට ගහල පොල්ල වරද නොගන්නේ

පොළඟා නම් මග රැකලා ඉඳින්නේ
දැක්ක ගමන් එලවන්නට හදන්නේ
වලිගේ කොටා කියලත් අර කියන්නේ
වල් ඌරට පුදුම බයක් තියෙන්නේ

මෙකී නොකී බොහෝ උරග සිටින්නේ
හැම එකාම දෂ්ඨ නොකර සිටින්නේ
දෂ්ඨ කලත් නිසරු බයක් නොගන්නේ
විසකුරු අය කිහිප දෙනයි සිටින්නේ


මතු බැඳේ...


පඤ්චාංගය (මිනි මැරතන් - 2010)



පඤ්චාංගය යනු අංග පහක් යන්නයි. උදාහරණයක් ලෙසට ගසක පඤ්චාංගය ලෙස කොළ, පොතු, මුල්, මල් හා ගෙඩි අර්ථ දැක්විය හැකිය. නමුත් අද මා කියන්නට යන්නේ ජ්‍යොතිෂයේ පඤ්චාංගය දිනය ගැනයි.

එනම් 

  1. දිනය,
  2. නැකත,
  3. තිථිය,
  4. යෝගය හා
  5. කරණය වේ.

එමෙන්ම දින 7 ක්, නැකත් 27 ක්,  තිථි 15 ක් , යෝග 27 ක්  හා කරණ 11 ක් ඇති බව මෙහි සඳහන් කළ යුතු වේ.

දිනයෙන් ආයු වර්ධනයද,  නැකතින් පව් දුරු කිරීමද, තිථියෙන් ශ්‍රියාවද, යෝගයෙන් නිරෝගී බවද, කරණයෙන් කාර්යය සිද්ධියද අර්ථ දැක්වේයැයි පොත පතෙහි සඳහන් වේ.




පඤ්චාංගය - දිනය


අපි මුලින්ම දන්නා කියනා දිනය ගැන බලමු.
එහිදී අප සාමාන්‍ය භාවිතයේ එන දින හතම වෙන වෙන නම් වලින් හැඳින්වේ.



සාමාන්‍ය භාවිතයේදීජ්‍යොතිෂයේදී
ඉරිදාරවි දින
සඳුදාචන්ද්‍ර දින
අඟහරුවාදාකුජ දින
බදාදාබුද දින
බ්‍රහස්පතින්දාගුරු දින
සිකුරාදාකිවි දින
සෙනසුරාදාශනි දින


එමෙන්ම ඉරිදාට ශිව ද, සඳුදාට දුර්ගාද (පාර්වතී),  අඟහරුවාදාට ස්කන්ධ කුමාරයාද, බදාදාට විෂ්ණු ද,
බ්‍රහස්පතින්දාට මහා බ්‍රහ්මයාද, සිකුරාදාට ශ්‍රී කාන්තාවද සෙනසුරාදාට යමද අධිපතියන් ලෙස කියැවේ. 

පඤ්චාංගය - නැකත

ජ්‍යොතිෂයේ නැකත් 27 ගැන සඳහන් වේ.
ඒ පිළිබඳව කෙටිම කෙටි අදහසක් දීමට මෙලෙස අකුරු කර තබන්නට උත්සුක උනෙමි.

ඒවා මෙලෙස දැක්විය හැකිය.
  1. අස්විද 
  2. බෙරණ 
  3. කැති 
  4. රෙහෙණ 
  5. මුවසිරිස 
  6. අද 
  7. පුනාවස 
  8. පුස 
  9. අස්ලිය 
  10. මා 
  11. පුවපල් 
  12. උත්‍රපල් 
  13. හත 
  14. සිත 
  15. සා 
  16. විසා 
  17. අනුර 
  18. දෙට 
  19. මුල 
  20. පුවසල 
  21. උත්‍රසල 
  22. සුවන 
  23. දෙනට 
  24. සියාවස 
  25. පුවපුටුප 
  26. උත්‍රපුටුප 
  27. රේවතී
මේ හැර අභිජිත් නම් නැකතක් ඇති අතර එය වැඩිපුර භාවිතා නොවන බව කියැවේ.


ඒ ඒ නැකතට අධිපති ග්‍රහයෙක් සිටිනා බව පොත පතෙහි සඳහන් වේ. එලෙසම නැකතකට අදාලව ගණ, යෝනි, වෘක්ෂ, පක්ෂි, ලිංගාදී කරුණු 10 වේ. පොරොන්දම් බැලීමේදී මෙමා කරුණු යොදා ගන්නවා ඇත.

කැති තුරුපල් තුරුසල ඉරුට සවිය ය
රෙහෙණ හත සුවණ දසවරුස සඳුට ය
මුවරිස් සිත දෙනට සත් අවුරුදු කුජ ය
අද සා සියාවස රාහුට අට ලොස ය

පුනවසි විසා පුවපුටු ගුරුට සොලොස ය
පුෂ නුර උත්‍රපුටුපා ශනි දස නම ය
අස්ලිය දෙට රේවතී බුධ සතලොස ය
මා මුල අස්විද කේතුට සතක් වී ය

පුවපල් ගුණය පුවසල බෙරණ නැකත ය
විස්සක් වරුස සිකුරා හට නියම වි ය
මෙකී මේ දශා මේ ලෙසට ගැන තී ය
උපන් නැකත දැන මෙලෙසින් දසාසො ය


පඤ්චාංගය - තිථිය

තිථිය යනු චන්ද්‍ර මාස ක්‍රමයට අනුව එක් දිනයකි. නමුත් පෙර කී පරිදි තිථි 15 පමණක් වේ. එයින් කියැවෙන්නේ මාසයකට එකම තිථිය දෙවරක් යෙදෙන බවය. එය සැබෑවකි. නමුත් මෙය සිදු වන්නේ පුර පක්ෂයට 15 ක් හා අව පක්ෂයට 15 ක් ලෙසය. පුර පක්ෂය යනු සඳු පිරීගෙන එන කාලයයි. අමාවක දිනයෙන් පටන් ගෙන පුර පසළොස්වක දිනය දක්වා පුර පක්ෂය වේ. අව පක්ෂය යනු පසළොස්වක දින සිට අමාවක දින දක්වා කාලයයි.

තිථි 15 මෙසේ දැක්විය හැකිය.
  1. පෑලවිය 
  2. දියවක 
  3. තියවක 
  4. ජලවක 
  5. විසේනිය 
  6. සැටවක 
  7. සතවක 
  8. අටවක 
  9. නවවක 
  10. දසවක 
  11. එකොළොස්වක 
  12. දෙළොස්වක 
  13. තෙළෙස්වක 
  14. තුදුස්වක 
  15. පසළොස්වක (අමාවක)

පඤ්චාංගය - යෝගය

මෙහිලා යෝග 27 ක් ගැන සඳහන වන අතර මේ යොඉග කුමක් සඳහා යොදා ගන්නේදැයි මම නොදනිමි. නමුත් පඤ්චාංගයේ එක ඇංගයක් බවින් එහි අඩංගු දෑ පිළිඹද අසටහනක් තැබීමට සිතුවෙමි.

එම 27 මෙසේය.
  1. විශ්කමභ 
  2. ප්‍රීති 
  3. ආයුෂ්මන් 
  4. සෞභාග්‍ය 
  5. ශෝභන 
  6. අතිගණ්ඩ 
  7. සුකර්ම 
  8. ධෘති 
  9. ශුල 
  10. ගණ්ඩ 
  11. වෘද්ධි 
  12. ධෘව 
  13. ව්‍යාඝාත 
  14. හර්ෂණ 
  15. වජ්‍ර 
  16. සිද්ධි 
  17. ව්‍යතිපාත 
  18. වාරියන් 
  19. පරිඝ 
  20. ශිව 
  21. සිද්ධ 
  22. සාධ්‍ය 
  23. ශුභ 
  24. ශුබ්‍ර 
  25. බ්‍රහ්ම 
  26. මාහේන්ද්‍ර 
  27. වෛධෘති

පඤ්චාංගය - කරණය

කරණය යනු අප ඉහතදී කී තිථියේ භාගයකි. මේවා කොටස් දෙකකි. ඒවා නම් චර කරණ හා තිර කරණ වේ.

චර කරණ 7 
  1. බව 
  2. බාලව 
  3. කෞලව 
  4. තෛතිල 
  5. ගරජ 
  6. වනිජ 
  7. විෂ්ටි

තිර  කරණ 7 
  1. ශකුණ 
  2. වතුස්පාද 
  3. නාග 
  4. කිංස්තුංග 


කරණ 11 ක් සියල්ල දැක්විය හැකි බව ඉහතදී මා විසින් සඳහන් කරන ලදී. ගොවිතැන් යුගයේදී වන සතුන්ගෙන් තම ගොවිතැන  ආරාක්ෂා කර ගැනීමට මේ කරණ යොදා ගත් අයුරක් පොත පතෙහි කියැවේ. ඒ වෙනුවෙන් කියැවුනු කවි කිහිපයක් මෙලෙස දක්වමි.


එක සිහ දෙක ඌරු තියවක ගජ කරණ
ජලවක කුකුළු පස එළු කරණ
සත ගව අට සිංහ නව සුකර කරණ
දසවක ගජ කරණ දැනගන් මේ ලෙසිණ

එකොළොස්වක කුකුළු කරණය කියන්නේ
සොළොස් දිවි තෙළෙස් එළු කරණය වන්නේ
තුදුස් ගවය පසළොස් සිංහය වන්නේ
පුරට කරණ මේ ලෙස දැන කියන්නේ

අට්වක ඌරු දියවක ගජ කරණවණු
තියවක කුකුළු ජලවක දිවි කරණවණු
පස එළු කරණ සැටවක ගජ කරණවණු
සතවක සිංහ අටවක සුකරයි දණු

නව ගජ දස කුකුළු එකොළොස් දිවි කරණ
දොළොස් එළු තෙලෙස් දැන් ගන් ගව කරණ
තුදුස් සිංහ අමාවක් සුකරයි දැණ
අවට කරණ මේ ලෙස ගැන ගෙන කියණ