December 27, 2013

මටත් ඩෙංගු හැදුනා

2013 අවුරුද්දත් ඉවර වේගෙන එන්නේ. ආපහු හැරිලා බලනකොට මොනවද කලේ කියලත් හිතෙනවා. හැබැයි මොන මොනවාහරි කොරගෙන නැතුවත් නෙමෙයි කියලත් හිතෙනවා. ඒ මොක උනත් බ්ලොග් කෙරුවාව නම් බල්ලට ගියා කියලයි හිතෙන්නේ. පේනවනේ  ආර්ටිකල් ලියන රේට් එකත් අම්බානක බැහැලා. ලියන්න දේවල් නම් නැතුවාම නෙමෙයි. වෙලාව හරස් උනා කියලා කිව්වොත් ටිකක් හරි. ඒ වගේම උනන්දුවත් ටික ටික බැහැලා ගිහිල්ලා. අවුරුද්ද අන්තිමට හරි මොනවා හරි කුරුටු ගාන ඕනෑ කියලා හිතුනු හින්දා ලියන්න ගත්තා. ම්...ම්...ම්... මොනවද අප්පේ ලියන්නේ... හරි.

අහා දැන් මේග පොඩ්ඩා ටිකක් ලොකුයි. ඒකට දැන් මාස 9ක් විතර වෙලානේ. උඩු ඇන්දේ දත් 4කුයි යට ඇන්දේ 2යි ඇවිල්ලා මාර කරදරේ. වඩා ගත්ත ගමන් උරපත්ත පලු යන්න හපනවා "හිටු මම හොද වැඩක් කරන්නම්" කියන්න වගේ. බඩගාන්නත් පුලුවන්. මොකඛරි අල්ලාගෙන යන්නතම් නැගිටින්න පුලුවන්. ඒත් ආයේ වාඩි වෙන්න නම් බෑ. එකපාරම අතාරින එක තමා කරන්නේ. සමහර වෙලාවට ඔලුව බිම ඇනෙන්නේ. කවුරුවත් දැක්කේ නැත්නම් අවුලක් නෑ. කවුරුහරි මොනවත් කිව්වොත් දෙක වෙන්න මොර දෙනවා. දන්නවනේ පොඩි එවුන්ගේ මැජික් වැඩ. ලොක්කා දැන් ලොක්කෙක් වෙලා ඉන්නේ. කොම්පුටරේ වැඩ ගිඩි ගිඩි ගාලා. ආසම වැඩේ පේන්ට් එකට. ආසම පාට නිල් වෙලා තියෙන්නේ. ඕනෑම වස්තුවක් නිල් කොරන්න තමා හදන්නේ. පාට පෙට්ටියක් ගත්තත් නිල් පාට තමා උස්සන්නේ. දුන්නේ නැත්නම් වලිම තමා.

ඔය අස්සේ මටත් ඩෙන්ගු හැදුනා. නවලෝක ඉස්පිරිතාලේ දවස් 8ක් උන්න. එකපාරම ඉවසන්න බැරි තරම් කොන්දේ අමරුවක් ආවා ඉරිදා රෑ පාන්දර 2.30ට විතර. පෙනඩෝල්වලට උණ බැස්සේ නෑ. 104 විතර නැගලා. ඉන්න බෑ. ඉඅවසන්න බෑ. මොකවත් මතක නෑ. බැරිම තැන දුනීල කියලා මගේ යාලුවෙක්ට කතා කරලා ඉස්පිරිතාලේ ගියා. මෑන්ස් ඩෙන්ගු ස්පෙෂල් කරලා තියෙන්නේ. කොහොමහරි ඩෙන්ගු ඇන්ටිජන් කියන එක පොසි කියලා ඇඩ්මිට් වෙන්න කිව්වා. මොනා කරන්ඩද? නැවතුනා. ඒ වේලාවේ 170 ට බැහැලා තිබ්බේ පට්ටිකා. ඔන්න හිමින් හිමින් ඒක බහින්න ගත්තා අන්තිමේදී 55ට ම බැස්සා. ඩොකාට හොරෙන් අර සිංහල බේතකුත් බිව්වා. ඒකෙනුත් මොනාහරි සහනයක් වෙයි කියලා. කන්න බොන්න මොනවත් බෑ. නින්ද යන්නෙත් නෑ. මොන වෙඩිමක්ද කියලා හිතුනා. ඒ මදිවට අහල පහල ඉන්න අයට බනිනවා හිටු කියලා. උණ විකාරෙන් හිටියේ දවස් දෙක තුනක්ම. බරත් බහින්න ගත්තා. කොහොමහරි අන්තිමට 8වෙනිදා වෙනකොට පට්ටිකා 120ට නැගලා ටිකට් කපලා ගෙඩර ආවා. එනකොටත් කාර් එකේම කලාන්තේ හැදුනා. අනේ මන්දා. ගෙදර ඇවිල්ලා නිදිම තමා. මොකවත් කරන්න බෑ. යන්තම් දවස් ගාණකට පස්සේ ඔෆීසියට ගොඩ බැස්සා. දැන්නම් යන්තම් ශේප්. ඒත් ඇගේ අමාරුව තියෙනවා. මහන්සි ගතිය එනවා. තව කාලයක් යයි ඕක ගොඩ යන්න. ඔන්න ඔහොමයි මට කෙල උනේ.

දැන් ඉතින් දැහැමින් සෙමින් කාලය ගත කරනවා. පූළුවන් වෙලාවක් මොනා හරි කුරුටු ගාන්න එන්නම්. එතකල් ආයුබෝවන්!!!


ඒ වගේම ලබන්නා වූ 2014 ඉතාමත් සාර්ථක අවුරුද්දක් වෙන්න කියලා බොක්කෙන්ම ප්‍රාර්ථනා කොරනවා ඔන්න. 

ජය!!!

October 16, 2013

දෙනෙතක් යනු හැර


නුහුරු නුපුරුදු
සිනහ කැන්දන
සරාවකටත් නෙතක් බන්දන
හතැස් ගගණක
රන් සළුවක් සේ
දිලිසෙන නුඹේ
මුවකමල
අතැහැර කෙලෙසද
දෙනෙතක් යනු හැර

August 23, 2013

මූණු පොතයි අසනීපවීමයි


මූණු පොතයි අසනීපවීමයි යන දෙක අතර කිසියම් සම්බන්ධතාවයක් ඇත්දැයි කිසිවෙක් ඔබය කියන්නට පිළිවන. මෙය ඒ සබැදෙන කෙටි ලිපියකි.

අනෝමා බලන්නකෝ. මගේ පොඩි එකාගේ පින්තූර ටික මම ෆේස් බුක් එකට දැම්මා. ඔන්න ලින්ක් එක. ඔයත් බලන්නකෝ...
ෂා.. මාර ලස්සනයි අනේ.. හරිම ස්වීට්...
කෝ බලන්න, කෝ බලන්න අනේ තුෂාරී මටත් ලින්ක් එක එවන්නකෝ...
ආ ඉන්න. මං එවන්නම්...
අනේ.. හරී ෂෝක්.. තාත්තා වගේමයි.. බලන්නකෝ පුංචි නහය... ෂා....
මං මේක යවන්නම්කෝ මගේ හස්බන්ඩ්ටත්....

ඔන්න ඉතින් ඔය මාස 3ක්වත් නැති පොඩි එකාව මූණු පොතට රිංගවනවා. මුළු ඔෆීසියේම එවුන්ට ලින්ක් එකත් දෙනවා. මේල් ලිස්ට් එකේ ඉන්න හැම එකාටමත් යවනවා. ඒ මදිවට පබ්ලික් පාරකුත් දානවා. ඕනෑ එකයි නැති එකයි හැම එකාම හූල්ල හූල්ල පින්තූර බලන්න ගන්නවා. සමහර එවුන් ඉතින් ඇස්වලින්
විතරක් නෙමෙයි වෙන වෙන ඒවයිනුත් පින්තූර බලනවා. දවස් දෙක තුනකට පස්සේ ඔන්න ආයෙත් තුෂාරි ඔෆිස් එනවා මෙහෙම කියාගෙන...

අනේ අනෝමා බලන්නකෝ අපේ පොඩ්ඩට සනීප නෑනේ... කිරි බොන්නෙත් නෑ.
ආ.. එහෙමද? ඒ මොකද එක පාරම..
අනේ මන්දා...
අනෝමා ඔය එක එකාගේ ඇස්වහ වැදිලා වෙන්න ඇති අනේ.. ඔයා ෆේස් බුක් එකෙත් දැම්මනේ.. හැම එකාම හූල්ල හූල්ල බලන්න ඇති...
ආ... ඇත්ත තමයි... මං වගේ මෝඩියෙක්... අදම ඔව්වා අයින් කරන්න ඕනෑ..


ඔන්න ඉතින් මූණු පොතට බනින්න ගන්නවා.. හොය හොය මකන්න ගන්නවා. හරිම කරදරයක් කර ගන්නවා. මං දන්නේ නෑ ළමයා අසනීප උනේ මූණු පොතේ දාපු හින්දද කියලා. ඒත් මමත් ඒක නම් පොඩ්ඩක් විතර අත්විදලා තියෙනවා. කොල්ලගේ පින්තූරයක් මූණු පොතේ දැම්මා නම් පහුවදාට බඩු. අඩුම ගානේ හෙම්බිරිස්සාවක්වත් හැදිලා ඇති. මේ දෙක අතර සම්බන්න්දතාවය අන්න්‍යෝය වශයෙන් බහිෂ්කරද කියලා මම දන්නේ නෑ. ඒත් මූණු පොතට පොඩි එවුන්ගේ පින්තූර දැම්ම ගමන් වැඩේ පත්තු වෙනවා කියලා නම මටත් හිතෙනවා. ඉතින් මේක බොරුවක් මිත්‍යාවක් වෙන්න පුලුවන්. ඒත් එහෙම වුනත් ඒ බොරුව පිළිඅරගෙන පින්තූර දාන එක නැවැත්තුවා අඩුම ගානේ මාස 6ක්වත් වෙනකම්. මම විතරක් නෙමෙයි තවත් කිහිප දෙනෙක්ම මේ කතාව කියපු හින්දා මට හිතුනා අකුරු කරලා බලන්න. සමහරු මේකට බනින්නත් පුලුවන්. ඒත් මම නම් හිතන්නේ මූණු පොතයි (පොඩි එවුන්) අසනීපවීමයි අතර සම්බන්ධතාවයක් තියෙනවා කියලායි.


July 24, 2013

ඇයි බං මේ


ලංකාවේ මේ දවස්වල නැගලම/බැහැලම යන සින්දුව මේක වෙන්න ඕනෑ. සමහරු යූ නලේට රිංගන්නේ සිංදුව අහන්න නම් නෙමෙයි. ඒකේ තියෙන කොමෙන්ටු ටික කියවන්න. ඒ අස්සේ සමහරු පොඩි බිස්නස් වැඩත් කර ගන්නවා. මම කිව්වේ මේ පොඩි ෆෝන් එකක්, කැමරාවක්, වාහනයක් වගේ විකුණ ගන්න වැඩ. හිනා යන වැඩේ කියන්නේ වඩේත් විකුණනවා... හික්ස්...

සිංදුව නම් මට තේරුනේ නෑ. සමහරවිට ඒක තේරෙන්න වෙනමම මානයක් ඕනෑද දන්නෙත් නෑ. ඒක මොක උනත් ටිකක් මහන්සි වෙලා තියෙන පාටයි. තනියම ඔය වගේ වැඩක් කරන්න ලේසි නෑ. කස්ටිය කොහොම මොනවා කිව්වත් නම් ඒක අගය කරනවා. වැඩේ සාර්ථකද නැද්ද කියන එක වෙනම කතාවක්. සමහර තැන්වලදී කැමරාව එල්ලලා පද්දවලා වගේ විඩීයෝ එක කරලා තියෙන්නේ. පොඩි පොඩි ජිමික්ස් වැඩ ටිකකුත් කරලා තියෙන පාටයි. 

හැබැයි කස්ටිය නම් කුඩු වෙන්නම ගහන පාටයි. මේ දැන් වෙනකොටත් "අකැමති" එව්වා 2000+ වෙලා. කොමෙන්ටු 3400+ වෙලා. මාර හිට් වීමක් වෙලා තියෙන්නේ. ඒක හින්දමද කොහෙද සිංදුවත් අයින් කරගන්න පාටකුත් නෑ. මමත් සෑහෙන්න කොමෙන්ටු ටිකක් කියැව්වා. සිනා කාල මැරෙන තරම් එව්වා තියෙනවා. පට්ට පට පට කිව්වලු..

අනේ කාලේ වනේ වාසේ කියලා කතාවක් තියෙනවනේ. ඒක හින්දා ඒ ගැනත් පොඩ්ඩක් හිතුවොත් තමා හොද..

Ex- Alien Lyrics 
(Uttering words)- “now am gonna s*x it up guyz-kick otta my-BMW 
                                Werewolf-de EX-yeah” 
 
 
How I wonder when I see your face with blue eyes they're shimmering-wow 
And I want to be with you my baby you know what am saying –wow 
When I want you.. I'll give hints by ma eyes 
And then I'll wait for u…come with zephyr with no shy 
(above part is repeated) 
 
All I want is you-never turn back-what am I to do-am going to die now oh// 
Gonna die now oh// 
Go-go-gonna d-d-die now wo-o-o 
Wo-o-o/// 
 
Hey-Ex-alien, where iz ma exaltation 
Why you make me exasperated 
And know you are exceptional 
 
Oh no no no no no 
 
Ex-alien , your lips are shiny crimson 
Superstitious heart throb oh ready 4 heart breaking 
Ha-heart breaking/// 
(Below is the rap) 
I know Haute cuisine baby 
Libidinous smile is amazing 
Shiny hair fluttering it’s crazy 
Alien don't you wanna kiss me? 
 
You are like a prince from France 
Take me to boutique with your super glance 
The Reason I talked about the cooking in the France
Is thinking you'd like it giving me a chance 
 
Transcendental lad from Mars  or from where 
How I tried to catch the zenith getting you yeah 
No matter you can dress me anywhere 
Love's trapped in my heart how can I share? 
 
A Hypersonic creature like you 
Knows more about human love it ooh 
You are super sonic super technologically used 
To your world our world really will loose 
 
(Spanish part) - Te queiro 
                           Ahora 
                         Te amo 
                         Elamor-elamor-elamor 
 
Wear your heart on your sleeve 
Then tell me what your point of view 
You are notta be a guillotine even in few 
C'mon yeah –huw EX-Alien, Alien…AHA!

July 16, 2013

"මහා කෙලි" ජාතකය

යටගිය දවස බරණැස්නුවර නොව කොළොම්තොට අපේ ඔෆීසියේ ගැන්සිය සැනෙකෙලි කෙලින්න්ට දිනයක් යොදා ගත්හ. මහා බෝසතාණෝ සිතන්නේ යමක් වීද, එය ඒ ආකාරයෙන්ම ඉටුවන්නාක් මෙන් වෙල්පෙයාර් එකේ බුවාලා යමක් සිතීද එය ඒ ආකාරයෙන්ම ඉටු නොවන්නට වූහ.

මෙදා පොටේ මහා පිටිය සරසන්නට කෙල මහා කෝටියක් පිරිස එතැයි අපද ඔද වැඩී ගිය මෙත්තාවෙන් කුකුලාද රැගෙනම පිටයට බටහ. අපගේ මහා පුණ්‍යකර්මයක් හේතුකොටගෙන උදෑසනම කිසිදු බුවෙක් පිටිය සැකසීමට උත්සුක නොවූ සෙයක් වන්නට වූහ. පෙරදා කල සැකසුම් ඒ පරිද්දෙන්ම ඉටුවන්නේද කෙසේද'යත් කියතොත්, පෙරදා බෙදූ මහා තෛලයේ බිංදුවකද අගයක් නොවන්නට මෙන් එකිනෙකා එතැන මෙතැන කුඩා ගම්සබා තනමින් කාලය බුදිමින් වන්නට වූහ. කාලය සුළුවූයෙන් හනි හනිකට එක් කරගත් පිරිසෙන් අඩක් රැගෙන වහ වහා නිවාස අලංකරනයේ යෙදෙන්නට වූයෙන් අලස බව අපෙන් මිදෙන්නට වූහ.

මහා පිටිය අලංකරණයට ඔෆීසියේ ගැන්සිය සිව් අයුරෙන් යුත් කල්ලි ගතවූහ. එක් එක් කල්ලිය වෙත එකිනෙකට වෙනස් වූ ප්‍රකෘත්තියන් නොහොත් තේමාවන් වන්නට වූහ.

මහා වෘත්තාන්තය එක්තරා ලෝහමය ද්‍රව්‍යයයකින් සැදුනු මනඃකල්පිත යකඩ පුටුවක පරම අයිතිය උදෙසා කෙරන්නාවූ මහා ලේ වැගිරීම්, වංචා කිරීම්, රැවටීම් අලලා ලියැවුණු මනඃකල්පිතයක් විය. ග්‍රන්ථයන් සතකින් යුතුවූ මේ මහා කතාවේ තවමත් අවසන් වී ඇත්තේ ග්‍රන්ථ පහක් පමණක් බවත් එයිනිදු තුනක් දැනටමත් චිත්‍රපටියට නැගී අවසන් බවත් තතු දන්නා "සීනා" වැනි පණ්ඩිතයෝ පවසත්. මේ අතරැම ගත්කතුද තවමත් හරිහැටි නොදන්නා කතාවේ අවසානය මෙසේ වන්නේයැයි පූර්ව නිගමනවලට බට පිරිසකුත් අප අතරම ගැවස ගත්හ. ඒ කෙසේ වූවද අපේ කෙලියට එයින් අපගමනයක් නොවන්නා මෙන් මහා උත්සවයට පිරිස මහා උනන්දුවෙන් කටයුතු සැලසුම් වන්නේය.

එකෙක් පරයා තවැකෙක් පුටුව සොරා ගනිතැයි මහා බියෙන් වෙව්ලා ලහි ලහීයේ තම තම හැකි පමණින් වෙර යොදා යුධ කටයුතුවල නිරතුරු වූහ. සරඹ කණ්ඩායමක් සැදීම එක්තරා අංගයක් වූයෙන් තම පිරිසේ අභිලාසය ඇත්තෝ සොයමින් එතැන මෙතැන කරගැසූ මූලිකයන් මහාමාරුවෙන් පිරිස සොයා කුඩා ව්‍යායාම පද්දතියක් සකසා ගත්හ. සැමදා ඉර මුදුන් යාමයේ මෙකී පිරිස ලාහට ගෙම්බන් එක් රැස් කරන්නාක් මෙන් එක් කොට හැකි පමණින් පුරුදු පුහුණු කරන්නට වූහ. ඇතමෙක් ඇඟ සැරසිලි ගැන වෙහෙසුනාහ. තවෙකෙක් ආවුද ආම්පන්න ගැන වෙහෙසුනාහ. බොහෝමයක් මුන්ට මොන්ගල්යැයි කියමින් එතැන මෙතැන කාලය කමින් ජීවත්වූහ.

සිතේ දහිරිය නිසාවෙන්ම අවසන් දින කෙසේ හෝ අටවා ගත් දර කැබලි සමගින් යුධ පිටියට බට සොල්දාදුවෝ කිසි බියෙකින් තොරව සටනට වන්නේ පිටිය පිරාවට තිබූ හිස් බව නිසාවෙන්යැයි තවෙකෙක් සිතන්නටවුහ. සැමදා මෙන්ම මෙදාට පුරුදු සුපුරුදු මූණු එකිනෙකා පසසමින් සමගියෙන් යුතුව මදු පානය කරමින් තම යුධ කටයුතුවල නිරතවන්නට වූහ. සමහරෙක් සිරස්වසද, සමහරෙක් තිරස්වද තවත් සමහරෙක් අඩ සිහියෙන් යුතුව කෙලෙමින් කාලය විකන්නට වූහ. අවසානයේ සියල්ලෝම සතුටින් නිවෙස්බලා ඇදෙන්නට වූයෙන් "මහා කෙලි" ජාතකය මෙසේ අවසන් වන්නට විය.

May 7, 2013

කොන්ඩේ කෙලින් කරපුවාම ඇවිදින වේගය ඉබේ වැඩි වෙනවාද?


නිකන් තියෙන කොන්ඩේ කෙලින් කෙරුවා ඔක්කෝමලා කරනවානම් මං කරාම මොකද කියලා බලන්න. මේන්න බොලේ මාර ආතල් එකක්නේ තියෙන්නේ. කස්ටියම බලනවා මගේ කොන්ඩේ ලස්සන. කැඩිලා කැරකිලා තිබ්බ කබ්බ කොන්ඩේ දැන් බලන්න දුකේ බෑ පීරලා වැටෙන ලස්සන. සමහරු අහනවා කොහෙන්ද කලේ, කීයක් ගියාද, ෂා නියමයි... ඉතින් අර වියදම් කරපු සල්ලි අපරාදේ කියලා පොඩ්ඩක්වත් හිතුනේ නෑනේ. දැන් ඉතින් පොඩ්ඩක් ගස්සලා යන්න ඕනෑ..

ම්.. ම්... ඔය තියෙන්නේ නියමෙට...

පැත්ත බලනකොට ආලෝකයේ වේගයෙන් මූණ හරවන්න ඕනෑ. නැත්නම් කෙලින් වෙච්ච් එකේ ආතල් එකක් නෑනේ.. ඔව්, නෑ, බෑ වචනයක් ගානේ ඔලුව වන වනා කතා කරන්න ඕනෑ... එතකොට කට්ටිය එක්ක බොරුවට හරි හිනා වෙන්න ඕනෑ. දන්න අඳුරන අය එක්ක කතාව අඩු කරන්න ඕනෑ. බොරුවට ගාණ උස්සන්න ඕනෑ. එතකොටනේ අගේ තියෙන්නේ. ආ අමතක උනානේ... හොඳට සද්දේ ඇහෙන සපත්තු දෙකක් ගන්නත් ඕනෑ.. කස්ටියම බලයි මගේ දිහා. එතකොට යනවා තවත් හයියෙන්...


කොන්ඩේ කෙලින් කරපුවාම ඇවිදින වේගය ඉබේ වැඩි වෙනවාද?

April 26, 2013

සිඟිති අවුරුදු උත්සවය



සිංහල අලුත් අවුරුද්ද ගෙවිලා ගිහින් දින කිහිපයක් ගත වෙලා. සැවොම තම තමන්ගේ පෙර කල කී කටයුතු නැවත් අරඹලා. ගෙවුණු සති කිහිපය අතීතයටම ගිහින්. ඒ නිසාම මා ලද අත්දැකීම් කිහිපයක් මෙසේ අකුරු කරන්නට සිත්වීය. එය හුදෙක්ම පෙර පාසැල් දරුවන්ගේ සිඟිති අවුරුදු උත්සව ඇසුරෙන් නිමැවූවක්ම විය. එය සත්‍යය වශයෙන්ම ඇගයීමට ලක්විය යුතු තරමේ කටයුත්තක් වූයෙන් මෙසේ අකුරු කරන්නට සිත්වීමි.

පෙරදා මෙන් නොව එදා අහස්කුස පුරාවටම එකදු කළු පැහැති වළාවක්වත් නොවීය. නිල්වන් ගඟන තලාව තැනින් තැන වසාගත් පුළුන්වන් සුදෝ සුදු වළාවන් අතරින් පතර අකාසයට ආනන්දයක් එක කරන්නට විය. මේ අතරේ එක් පෙරපාසැලක සිඟිති අලුත් අවුරුද්ද සමරන්නට නෙයෙක් කාරණා කටයුතු සිදුවෙමින් තිබෙන්නට විය. අවුරුදු කුමාරයා එක් නගර මාධ්‍යයක සිට ඔවුන්ගේ අවුරුදු උත්සවය දක්වා දිවෙන මහා මාර්ගයේ පෙරහැරින් පැමිණීමට කටයුතු යොදා තිබුණි. අසරුවන් පිට නැගි අවුරුදු සිඟිති කුමාරයා මහත ආඩම්බර ලීලාවෙන් පෙරමුණේ මග හසුරවන්න්ට විය. එකා පසුපස ඇදෙන කඩි රැලක් මෙන් අවුරුදු කුමාරය මග යමින් ඔහුගේ පරිවාරක පිරිසද මහත් ආඩම්බරයෙන් යුතුව අවුරුදු උත්සවය දෙසට මහත් උත්වසාකාරයෙන් සැරසුණු ගැල්වල නැගී පිය මනින්නට විය. මග අසුරාගත් පිරිස අත්පොළසන් දෙමින් ජය ඝෝෂා නගද්දීම උදෑසන අවුරුදු කුමාරයා සිඟිති අවුරුදු උත්සවයට අවුරුදු උදාකර දෙන්නට අසුපිටින් බිමට බට වන්නට විය. රතිඤ්ඤා හඬ මහා නාද සදද්දී මනා වස්ත්‍රාභරණයෙන් සරසුණු අවුරුදු කුමාරයා මෙන්ම සෙසු පිරිවරද සෙමෙන් සෙමෙන් අලංකෘත ගැල්වලින් බිමට වන්නට වූයේ අවුරුදු සැණකෙලිය ආරම්හ කරන්නට අවසර දෙන්නාක් මෙනි. අවුරුදු කුමාරයා පිළිගන්නට පෙර පාසැලේ දරුවන් මහත් ආසාවෙන් පෙළගැසී සිටි ආකාරය කාගෙත් නෙත් සිත් පිනවන්නට කරුණක් නොවූයේ නම් එය මහත් පුදුමයෙකි. සුපුරුදු පරිදිම පාසැල් ගීතය වාදනය වූයෙන් සියල්ලෝම තම අසුනින් නැගිට ආචාර සමාචාර කරන්නට වූහ.

මීළඟට එළඹි පිළිගැනීමේ කතාව කාටත් අමන්දානන්දයක් වූයේ එහි වූ වදන් වැකි නිසාම නොව එහි වූ අයුර නිසාවෙන්මය. මේ සඳහා දරුදැරියන් කිහිපදෙනෙක්ම වූයෙන් පිළිගැනීමේ කතාව එකිනෙකා අතර හුවමාරු කිරීමට සිදුවන්නට විය. මහා සභාවක් මැද කිසි පැකිළීමකින් තොරව තම බත්පත එකිනෙකාතර බෙදා ගන්නේ කෙසේද ඒ යුරින්ම මේ දරුවන් කතාවද මනා සේ බෙදා ගන්නට විය. සැවොටම පොදු වූ දුරස්ථපාලක ශබ්දවාහිනිය එකිනෙකා අතර හුවමරු කෙරමින් මනා සංයමයෙකින් යුතුව තමන්ගේ රාජකාරිය නෙහොත් පිළිගැනීමේ සංවාදය කාගෙත් නෙතු මොහොතකට නවතාලන්නට තරම හේතු කරවන්නට මේ සිඟිත්තන් සමත් නොවූයේ නම් එය මහත් මුසාවකි. ඒ බව සංවාදය අවසන නැගුණු අත්පොළසන් නාදය සාක්ෂයම විය.

සැවොටම ආදර්ශයක්, ඔවදනක් ලෙසින් කුඩා සිඟිත්තෝ අවුරුදු සිරිත් විරිත් ඉටු කරන්නට වූහ. සුදු ඇඳුමෙන් සැරසී ගත් සිඟිත්තෝ පිටියේ එක් කොනකින් ඇරඹි ගමන අවසන් වූයේ බෞද්ධයාගේ ගෞරවය මහත්ව ඇති පන්සල වෙතට පිය තබමිනි. කාටත් සුපුරුදු කන්කලු ඝන්ඨා නාදය සෙමෙන් මැකීයද්දී ඔවුන් එළඹියේ අවුරුදු සිරිත් අනුව ළිප ගිනි මෙලවීමාදී නැකත් ඉටු කිරීමටය. වැඩ ඇල්ලීම අවසන් කල ඔවුන් චාරීත්‍රානූකූලව අවුරුදු සමරන්න විය.

රන්වන් වටනා කාලය සෙමෙන් ගත වෙද්දී මුළු උත්සව පිටියම එකම එක රංග භූමියක් වූයේ සිඟිත්තන්ගේ හැකියාවෙන්මය. තැන තැන විසිර ගත් කුඩා කුඩා කවයන්ගෙත් සැදුම් ලත් කුඩා දරුවන් එකෙනෙකා හැපෙමින් මහත් දැක්මකට අරාඳිනා අයුරු කා අතරත් සිනා ගෙනෙන්නට විය. ඒ ඒ

 කවයන්ට අන‍න්‍යය වූ පැහැයක් වූයෙන් මේ නම් වෙනත් කිසිවක් නොව එකිනෙකාගේ කැලෑසිය වෙන් කර හඳුනා ගැනීමට යොදාගත් මනා ප්‍රයෝගයක් බව මොළ ඇත්තවුන්ට සක්සුදක්ම වූයේ එහි වූ ගුණාත්මකභාවය අගය කරමින්ය. නොයෙක් වාර්ණයෙන් යුතු වූ ඇඳුම් ආයිත්තම් නිසාවෙන් එකිනෙකා පහසුවෙන් වෙන්කර ගත හැකිවා මෙන්ම තමන්ගේ කුලකයේ සෙසුන් හා එක්වීමට මහත් පහසුවක් වන්නට විය. මෙය නරඹන්නට ආනන්දයක් වූයේ එක් එක් වසස් මට්ටමේ දරුවන්ගේ නර්තනයන් බොහෝ වෙනස්විය යුතු වුවත් සි‍යළුදෙනාම පාහේ එකම අයුරින් නර්තනයේ යෙදීමේ අපූරුව නිසාය. අවුරුදු දෙක හමාරක පටන් අවුරුදු පහ දක්වා වයස් මට්ටම්වල සිටි මෙම සිඟිත්තන් එකම නර්තනයක සිදු කලේ කෙසේදැයි බොහෝ දෙනා අතර වූ සංවාදාත්මක කරුණකි. මෙහිලා කඩතුරාව පිටුපස සිටි අයවලුන් තමා හෙලූ දහඩිය ගඟට කැපූ ඉණි නොවී මහා බළකොටුවකට තැනි පළමු ගොඩල වූයේ යැයි සිතමින් සිහින්ව ආඩම්බර නොවූවා නොවේ.

එකිනෙකට වෙනස් වූ ගීත කිහිපයකට රංගන දායකත්වයට දීමෙන් පසුව තම තමගේ කැලෑසි වෙතට පිය නැගි සිඟිත්තෝ රිසි රිසියේ අවුරුදු කැවිලිවල රස බලන්නට වූහ.ඉක්බිති එළැඹෙන ජන ක්‍රීඩා සඳහා අවැසි ජවය ශක්තිය ලබා ගැනුමට මෙන් ඔවුන්ගේ අහාර ගැනීම වෙනදාට වඩා වෙනස් අයුරකින් සිද්ද වූයේ රසකැවිලි අවුරා තිබූ අයුර නිසාවෙන් විය යුතුය. මනා ලෙස සංවිධානය කොට තිබූ ක්‍රිඩා වයසට ගැලපෙන අයුරින් මෙන්ම ශ්‍රී ලංකේය අතීතය හා මනාව ගැලපෙන ලෙසින් සැකසුනු අයුරක් කාහටත් පැහැදිළි වන්නට විය.

අවුරුදු පිටියේ සැකසුම හා අලංකරණය ගැන අකුරු කිහිපයක් සටහන් නොකලේ වී නම් සටහන සම්පූර්ණ නොවන බව හැඟුනෙන් මෙසේ වදන් එක් කරන්නට සිත් විය. දෙමාපියන් උදෙසා සැකසුණු කුටි සරසා තිබුණේ පිදුරු, ලණු හා පොල් අතු ආශ්‍රයෙනි. එමගින් ලද අලංකෘත බව වඩ වඩාත් ඔප් නැංවීමට දායක වූයේ ඒ හා සමාන්තරව දිවෙන්නාවූ උණ බට වැටෙනි. කතිර ආකාරයට සකැසුනු උණ වැට වටා එතුනු පිදුරු ලණුව මනා ගැලපුමක්ම විය. ජෝතිෂ්‍යයට අනුව අප හා බැඳි මේෂ, මීනාදි ලග්න දොලොස මේ කුටි අලංකරණයට දුන් දායකත්වය පැසසිය යුතුය. අප හා යමින් ජීවන ගමනට දිරි දෙන හිරු හා සඳු එක් පෙදෙසකින් කාගේත් මන බඳින්නට විය. තවත් පසෙක පන්සල, ඝන්ඨා කුලුණ, ළිඳ හා ගැමි ගෙය අවුරුදු පිටියේ  සුන්දරත්වය මෙන්ම සිංහල සම්ප්‍රදායද අමතක නොකලබවක් සනිටුහන් කලේය. ඔංචිල්ලාව, කොට්ටාපොර තරඟ සඳහා සැකසුණු පොල් කඳන් කිහිපයත් අවුරුදු අසිරිය වඩ වඩාත් ඔප්නංවන්නට විය. මෙසේ අකුරු කරන්නට නොහැකි තරමේ මනා පිටිය සැකසුමක් දක්නට විය. පිටියේ වූ ඉඩ ප්‍රමාණ අඩුව හැරෙන්නට සටහන් කල යුතු තරමේ දොසක් නොවන්නට තරම් ඔවුහු සාර්ථක වූහ. එයද සිදුවන්නට ඇත්තේ අනුමාන කලා වූ ප්‍රමාණයටත් වඩා පිරිස් මෙහි පැමිණීම නිසාවෙන් විය යුතුය.


කෙසේ වෙතත් මෙවන් සාර්ථක කටයුත්තක් ඉටු කිරීමෙහිලා දෙමාපියන් දරුවන් මෙන්ම පාසැලේ ගුරුවරුන් දැක්වූ මහත් වෙහෙස නැවත නැවතත් අගය කල යුතුය. ශ්‍රී ලංකේය අභිමානය, ප්‍රෞඪ ඉතිහාසය මතු අනාවකටත් ශේෂ කරමින්, දායාද කරමින් නිවැරදි අයුර නිවැරදි ආකාරයටම පෙන්වාදෙමින් මෙසේ කරන්නා වූ මහත් සමාජ සත්කාරයන් පැසසිය යුතුමය. මෙයින් ලැබෙන අතුරු පල එනම් ප්‍රසිද්ධිය, ගෞරවය හා පිළිගැනීම එම පොර පාසැල ලැබිය යුත්තක් මෙන්ම එය නිසියාකාරයෙන් ඔවුන්ට ලැබෙන්නට ඇත. පිදිය යුත්තන් පිදිය යුතු සේම අගය කල යුත්තන්ද අගය කල යුතුය. පැසසිය යුතුය.

March 28, 2013

සීයාගේ ස්වයංක්‍රීය පිළිතුරුදීමේ යන්ත්‍රය



හලෝ ආයුබෝවන්. සමාවන්න. මේ මොහොතේ අප නිවසේ නොසිටී. කරුණාකර ඔබේ පණිවුඩය බීප් නාදයට පසුව සඳහන් කරන්න.

බීප්.. ප්....ප්....

ඔබ අපේ දරුවෙක්නම් අංක එක(1) ඔබන්න. දැන් ඔබ පවුලේ කීවෙනියාද යන්න දැක්වීම සඳහා එකේ සිට පහ දක්වා ඇති අංකවලින් ඔබේ අංකය ඔබන්න. මීළඟට මතු දැක්වෙන මනාපයන් තෝරා ගන්න.

අප ඔබේ දරුවන් සමග සිටීමට අවැසි නම් අංක 2 ඔබන්න.
ගමනක් යාමට අපගේ මෝටර් රථය අවැසි නම් අංක 3 ඔබන්න.
ඔබේ රෙදි සෝදා වේලා ගැනීමට අවැසි නම් අංක 4 ඔබන්න.
ඔබේ දරුවන් අපේ ගෙදර අද රාත්‍රිය නැවැත්වීමට අවැසි නම් අංක 5 ඔබන්න.
අප ඔබේ දරුවන් පාසැලින් ගෙදරට ඇරලීමට අවැසි නම් අංක 6 ඔබන්න.
අප අද රාත්‍රී ආහාරය සූදානම් කිරීමට අවැසි නම් අංක 7 ඔබන්න.
අප කෑම සකසා ඔබේ නිවසට ගෙනත් දීමට අවැසි නම් අංක 8 ඔබන්න.
ඔබට කිසියම් මුදල් ප්‍රමාණයක් අවැසි නම් අංක 9 ඔබන්න.

අපට රාත්‍රී ආහරයට ආරාධනා කිරීමට හෝ චිත්‍රපටයක් නැරඹීමට යාමට ආරාධනා කිරීමට නම් දැන් කතා කිරීම ආරම්භ කරන්න.
අපි දැන් අසා සිටින්නෙමු....

March 13, 2013

දෙදරූ පියෙක් වූ වගයි

මම දෙදරූ පියෙක් වූ වග මෙයින් දන්වා සිටිමි. අපේ බිඟු කුමාරයාට සෙල්ලම් කිරීම පිනිස තවත් එක් බිඟු කුමාරයෙක් අප මීවදයට එක් වූ වගත් අපේ දඟයා ඉතා ආසාවෙන් නව කුමාරා සමග සිටිනා බවත් තවදුරටත් දන්වා සිටිමි. තවමත් නමක් ස්ථිර කර නොමැති අතර ඒ සඳහා නම් කැඳවනු ලැබේ. හැකියාව ඇති නැති කාටත් ඒ සඳහා ඉදිරිපත් විය හැකි අතර අවසන තීරණය රැජිණ විසින් ගනු ලබයි. උපන් දිනය: 2013-03-06

February 3, 2013

චංගුමී අද මොකද කරන්නේ?



චංගුමී අද මොකද කරන්නේ? 
වෙන මොනවා කරන්නද? මොකක් හරි කෑමක් උයාගෙන රජ්ජුරුවන්ට බෙදයි. රජා රහයි රහයි කිය කිය කයි.  
උයාගෙ කනවා ඇරෙන්න වෙන මොනවද වෙන්නේ? 

මෙන්න මෙහෙම කියපු ගොඩක් අය සද්ද නෑ වගෙයි. සුජාත දියණි කතාව සම්පූර්ණයෙන්ම කෑම ගැන තියෙන කතාවක්ය, ඒක ගෑණු අල්ල ගන්න හදපු ගොන් කතාවක්ය, නිකන්ම නිකන් ගෑණු පොර කරන්න හදපු අර ප්‍රවීණා වගේ කතාවක්ය ආදී වශයෙන් අනුමාන කළ ඇත්තෝ ඒ දවස්වල මේ වගේ කතා නම් දහසක් ගොතන්නට ඇත. නමුත් ඔවුන්ට දැන් ඔවුන්ගේ විළි වසාගන්නට සිදුවී ඇතිවාසේය. මේ දිනවල චංගුමී කරන්නේ උයන එක නෙවේය. බෙහෙත් කරන එකය. ඒ නිසා පෙර කී උයන කතා දැන් වලංගු වන්නේ නැත. 

ඒවා කෙසේ වෙතත් සෑම පවුලකම එක් අයෙක් හෝ මෙම නාටකය නොබල්ලනේයැයි නම් කිව නොහැකිය. වෙනදා රෑ වනතුරු කරක් ගැසූ කොල්ලෝ කුරුට්ටෝ පවා දැන් සවස 6.30 වන විට රූපවාහිනියක් ළඟට ඇදෙන්නට අරගෙනය. අම්මලා 6.30 වන්නට පෙර රාත්‍රී ආහාර සූදානම් කර අවසානය. මෙසේ මුළු ලංකාවම වාගේ චංගුමී එසේත් නැත්නම් සුජාත දියණි බලන්නට එක් රොක් වන්නේය. බොහෝ නිවෙස්වල එය පවුලේ නාටකය වී ඇත්තේය. මා එහි කිසිම දොසක් නොදකින්නේ ඒ හරහා කිසියම් වූ ලාබ ප්‍රයෝජන කිහිපයක් කාටත් හොරා අපට ලැබෙන නියාව නිසාය. අඩුම වශයෙන් පවුලේ සියල්ලන්ටම එකට සිට නැරඹිය හැකි තරමේ නාටකයක්වත් වීමය. 

කෙසේ වෙතත් දැන් නාටකයේ අවසාන අවධියට එලැඹ ඇත. තවත් සතියකින් පමණ මෙය අවසන් වන්නේය. කොටස් 54ක් පමණ ඇති මෙම නාටකය ලංකාවේදී කොටස් 75ක් පමණ දික් කර ඇත්තේ අතරින් පතරට වෙළඳ දැන්වීම් එක් කිරීමෙනි. මිනිසුන් මෙසේ ඇලී ගැලී මෙම නාටකය නරඹන්නට හේතුව සොයා අපද මෙවැනි නාටක ලංකාවේ නිපදවිය යුතුය. මෙගා නාටක කෙරුවාව අහකට දමා සමාජයේ කුතුහලය දැනුමත් එක් කරමින් කෙරනා නාටක කළ යුතුය. 

මා මෙම නාටකයේ කැමතිම ගුණාංගය වන්නේ පරිසර හිතකාමී ලෙස කෙරෙන කටයුතුය. හුදෙක් අතීත මිනිසා පරිසරය හා සමගිව සිටි ආකාරයත් කුමංත්‍රණාදී කටයුතු නිසා මිනිසා පිරිහෙන සැටිත් සරලව අප අතරට ගෙන එන්නට තරම් අධ්‍යක්ෂක සාර්ථක ඇති බවක් මා දකින්නේය. 
තව එක් කරුණක් සිහි කිරීමට කැමැත්තෙමි. මේ කතාව අවසන් වී වහාම තවත් එක් කොරියානු කතාවක් එන්නේය. මෙය එතරම් සුබ ලකුණක් නොවේ. අපේ මිනිස්සු එක් දෙයක් එහි රසය නැතිවනතුරු පට්ට ගසති. ගුණාත්මකභාවය හා රසාත්මකභාවය රැකගෙන කටයුතු සිදුවන්නේ නම් කෙතරම අගනේද?

January 19, 2013

යුග යුග බැඳි පෙම් දමින් වෙලන්නට

යුග යුග බැඳි පෙම් දමින් වෙලන්නට 
සිතුවිලි පවුරට කවුලු තියන්නට 
ගලනා සිතිවිලි හද පුරවා 
සෙනේ වඩන්නෙමි සසර පුරා...  
සෙනේ වඩන්නෙමි සසර පුරා... 


මිහිකතරට වැටි සිහින් කඳුල ඔබ 
තෙත් කෙරුවා අද වියරු වැටුනු සිත 
කැඩී බිඳී ගිය පවුරු සදා 
සනසාලූවා මහද පොපියවා... 
සනසාලූවා මහද පොපියවා... 

යුග යුග බැඳි පෙම් .... 

අමාවකට ආ තරු කැකුලයි නුඹ 
පාලු අහස විකසිත කරමින් 
දිවියේ සරදම් ඉවසා සිත්ගෙන 
හද පුරවමි මා සසර පුරා... 
හද පුරවමි මා සසර පුරා...

යුග යුග බැඳි පෙම් .... 


ආදරයෙන් හා ජීවිතයෙන් ලද බොහෝ ගැහැට කම් කටොළු නිසා හෙම්බත්ව අද දිනය සරිකරනා එක අහිංසක ලඳකි. ඇගේ දිවියේ අරුණලු පුබුදන්නට ඔහු ඇයට ඉන්ද්‍රකීලම විය. යුග යුග බැඳි ආ සසර බැඳීමක්දෝ ඇයට දහස් වතාවක් සිතෙන්න්යට ඇත. ඇගෙ සිතිවිලිවලට කපොලු තබමින් ගලා ආ සිතිවිලි ගඟ පත් ඉරුවල බොඳ කරන්නට සිතෙන්නට ඇත. වියරු වැටී තිබුණු ඇගෙ දරදඬු සිත් මඩල ඔහුගේ කඳුලින් සුවපත් වන්නට ඇත. අමාවකට තරු නැති දා ආකාසයට, පාලු මකන්නට අලුතෙන් පායා ආ තරු කැකුලක්ම විය. එයට බැඳි පෙම මෙසේ අකුරුවන්නට ඇත.


January 4, 2013

ලිංගික අධ්‍යාපනය ගැන ළමුන් දැනුවත් කල යුතුය




 
මෙම විඩීයෝ පටය අප සමාජයට ඉතා වැදගත් පණිවුඩයක් ගෙන එන්නේය. අවුරුදු 6ත් 8ත් අතර කුඩා දරුවන් කිහිපදෙනෙක් සමග එක් වී කරන්නාවූ මෙම සංවාදය ලිංගිකත්වය යන්න කුමක්ද යන්න හා අපයෝජනය යන්න කුමක්ද යන්න ඉතා සරල බසින් විස්තර කෙරේ. මෙහි ප්‍රධාන කරුණු 3ක් ගැන සඳහන් වේ. 

1. ශරීරයේ කිසිවෙක් ස්පර්ශ නොකල යුතු ස්ථාන 3ක් වේ. එනම් පපුව, තට්ටම් හා  කකුල් අතර ප්‍රදේශය වේ. මේ කාරණාව ඔබේ දරුවාටත් තේරුම් කර දෙන්න

2. කිසිවෙක් මෙම ප්‍රදේශයන් ස්පර්ශ කලේ නම් වහාම කෑ ගහන්න. (මොකද කරන්නේ... එපා... ආදී වශයෙන් ඒ බව දරුවාට කියා දෙන්න)

3. වහාම ඔබේ විශ්වාසවන්ත පුද්ගලයෙක් වෙත දැනුම් දෙන්න. විශ්වාසවන්ත පුද්ගලයන් කවුරුද කියා අඳුන්වා දෙන්න. මව, පියා, ඔවුන් නොමැති අවස්ථාවේදී ඊළඟට විශ්වාසවන්ත පුද්ගලයා ආදී වශයෙන් කියා දෙන්න.

මෙම පාඩම ඔබේ දරුවා සමාජයේ සිදු වන අපයෝජනයන්ගෙන් බේරා ගනී. අදම මෙය අරඹන්න. වඩා වැඩදායි දරුවන් බිහි කරන්නට ඔබේ දරුවාට මේ පාඩම් කියාදී ඔබත් සහය දක්වන්න.